قازاقستاندا جىل سايىن 31 تامىزدا شاحتەرلەر كۇنى اتالىپ وتەدى.
اتاۋلى كۇنگە وراي ەنەرگەتيكا ءمينيسترى ەرلان اقكەنجەنوۆ سالا ماماندارىن مەرەكەمەن قۇتتىقتادى، دەپ حابارلايدى aqshamnews.kz.
"بارلىق كەنشىلەر مەن كومىر ونەركاسىبى ارداگەرلەرىن ناعىز ەرلىك، توزىمدىلىك پەن جانقيارلىق ەڭبەكتىڭ كاسىبي مەرەكەسىمەن شىن جۇرەكتەن قۇتتىقتايمىن!
قازاقستانداعى كومىر ونەركاسىبىنىڭ تاريحى ونىڭ باستاۋىندا تۇرعان ادامداردىڭ ەسىمدەرىمەن تىعىز بايلانىستى. ءدال وسى ارداگەرلەر بەرىك نەگىز قالاپ، ۇرپاقتار ساباقتاستىعىن قامتاماسىز ەتىپ، ەڭبەكتىڭ قاۋىپسىزدىك مادەنيەتى مەن داڭقتى داستۇرلەرىن قالىپتاستىردى.
بۇگىنگى تاڭدا دا شاحتەرلەر ەلىمىزدىڭ دامۋىنا شەشۋشى ۇلەس قوسۋدا. كەنشى ەڭبەگى – ناعىز ەرلىك. جەر قويناۋىنان پايدالى قازبالاردى ءوندىرۋ جوعارى بىلىكتىلىكتى عانا ەمەس، تولىقتاي جانقيارلىقتى قاجەت ەتەدى.
ەلىمىزدە 30 كومىر وندىرەتىن كاسىپورىندا 32 مىڭنان استام ادام ەڭبەك ەتىپ، جىل سايىن 100 ميلليون توننادان استام كومىر وندىرەدى. سونىڭ ارقاسىندا سالا ەلىمىزدەگى ەلەكتر ەنەرگياسىنىڭ 70%-ىن ءوندىرۋدى قامتاماسىز ەتىپ، كوكسوحيميا ءوندىرىسىن تولىق جۇكتەيدى، سونداي-اق ونەركاسىپتىك كاسىپورىنداردىڭ، كوممۋنالدىق-تۇرمىستىق سەكتور مەن حالىقتىڭ وتىنعا دەگەن قاجەتتىلىگىن تولىق قاناعاتتاندىرادى.
سىزدەردىڭ ەڭبەكتەرىڭىزدىڭ ارقاسىندا ەنەرگەتيكالىق تۇراقتىلىق قامتاماسىز ەتىلىپ، ونەركاسىپ دامىپ، قازاقستاننىڭ ەكونوميكالىق الەۋەتى نىعايا تۇسۋدە. سىزدەر – ەلىمىزدىڭ ەكونوميكاسىنىڭ تىرەگى ءارى حالىقتىڭ ماقتانىشىسىزدار.
ەنەرگەتيكا مينيسترلىگىنىڭ جانە ءوز اتىمنان سىزدەرگە جانە جاقىندارىڭىزعا زور دەنساۋلىق، اماندىق، ءاربىر جۇمىس ورنىندا قاۋىپسىزدىك پەن جاڭا جەتىستىكتەر تىلەيمىن. ەڭبەكتەرىڭىز ءاردايىم لايىقتى باعالانىپ، قۇرمەتكە بولەنە بەرسىن! مەرەكە قۇتتى بولسىن!" - دەدى مينيستر.