كەنەنىڭ شاعۋى نەگە ءقاۋىپتى؟

جازدا جازعى سەرۋەندەۋ، ساياحاتتاۋ، تابيعاتتا بولۋ كەزىندە كەنە شاعۋ ءقاۋپى ارتادى

كەنە ادامعا  جابىسادى جانە  انەستەتيكالىق زاتتى ەنگىزگەندىكتەن مۇلدەم اۋىرتپايدى. اش كەنە وتە كىشكەنتاي – كوكنار تۇقىمىنىڭ مولشەرىندەي عانا بولادى، دەپ حابارلايدى Almaty-akshamy.kz.

دەنساۋلىق ساقتاۋ مينيسترلىگى باسپا ءسوز قىزمەتىنىڭ مالىمەتىنە سۇيەنسەك، كەنە ادامنىڭ دەنەسىندە 12 كۇنگە دەيىن جابىسىپ تۇرا الادى جانە وسى ۋاقىت ىشىندە ديامەترى 2 سم بولاتىن شاردىڭ مولشەرىنە دەيىن وسەدى.

كەيبىر جاعدايلاردا كەنەلەر ەنسەفاليت، كەنە سۇزەگى، كەنە بوررەليوزى، كونگو-قىرىم گەمورراگيالىق قىزباسى سياقتى ءقاۋىپتى اۋرۋلاردىڭ تاسىمالداۋشىسى بولىپ، اللەرگيالىق رەاكسيالار تۋدىراتىنىن ەستە ۇستاعان ءجون.

ەگەر كەنە شاعىپ السا نە ىستەۋ كەرەك؟

ەڭ دۇرىسى دەرەۋ دارىگەرلەرگە مەديسينالىق كومەككە جۇگىنۋ كەرەك.

بىرىنشىدەن، كەنەنى تولىعىمەن ءوز بەتىنشە الۋ مۇمكىن ەمەس. كەنەنىڭ باسى جۇلىنىپ، جارانىڭ ىشىندە قالۋى مۇمكىن. 

ەكىنشىدەن، ەم-شارا  كەزىندە كەنەنى ۇساقتاۋعا بولادى. جاندىكتەردىڭ ۋى دەنەگە تەرى ارقىلى دا ەنۋى مۇمكىن. ەم-شارانى جۇرگىزۋشىگە جۇقتىرۋ ءقاۋپى بار.

ۇشىنشىدەن، ەگەر ءسىز كەنەنى ءوزىڭىز الىپ تاستاساڭىز  ونىڭ جۇقتىرعىشتىعىن ءبىلۋ مۇمكىن بولمايدى جانە ونى تەكسەرۋ ءۇشىن مامانعا بارۋ كەرەك.

ەگەر كەنە شاعىپ العاننان كەيىن دەنە تەمپەراتۋراسىنىڭ جوعارىلاۋى، اۋىرسىنۋ، قاتتى باس اۋرۋى بايقالسا، دەرەۋ دارىگەرمەن كەڭەسۋ كەرەك. ءوزىن-وزى ەمدەۋ قايعىلى سالدارعا اكەلۋى مۇمكىن.

جاندىكتەرمەن بايلانىستا بولۋدان قالاي ساقتانۋعا بولادى؟ تابيعاتقا (جايىلىمعا، ەگىستىككە جانە دەمالىس ورىندارىنا) بارعان كەزدە جاندىكتەردىڭ شاعۋىنان قورعانۋ قۇرالدارىن (رەپەللەنتتەردى) وزىڭىزبەن بىرگە الىڭىز.

قاتتى، اشىق ءتۇستى كيىممەن جاقسى كيىنىپ، دەنەنىڭ اشىق جەرلەرىن  (بەت، مويىن، قول، توبىق) مۇمكىندىگىنشە ازايتۋعا تىرىسىڭىز، جابىق اياق كيىم كيىڭىز.