بالا وتكىر وتتەگى جەتىسپەۋشىلىگى بەلگىلەرىمەن تۋعان. نەوناتولوگ دارىگەرلەر ءسابيدىڭ دەم الۋىن قالىپقا كەلتىرۋ ءۇشىن شۇعىل رەانيماسيالىق ارەكەتتەرگە كوشتى. تىنىس الۋدى تولىعىمەن قالپىنا كەلتىرۋ مۇمكىن بولمادى. وعان سەبەپ، جاڭا تۋعان ءسابي وكپەسىنىڭ ەكى جاقتى قابىنۋى. كەيىننەن انىقتالعانداي، قۇرساقىشىلىك تىنىس الۋ جەتىسپەۋشىلىگى جۇكتى كەزىندە اناسىنىڭ ينفەكسياسى بالاعا جۇققاندىعى سەبەپ بولعان.
ءسابي وزدىگىنەن دۇرىس تىنىس الا الماعاندىقتان تۋعاننان باستاپ، الماتى قالالىق №4 پەرزەنتحاناسىنىڭ جاڭا تۋعان سابيلەرگە ارنالعان قارقىندى تەراپيا جاعدايىندا، وكپەنى جاساندى جەلدەتۋ اپپاراتىندا جاتتى. دارىگەرلەردىڭ ايتۋىنشا، بالا جاقسى كورسەتكىشتەرمەن تۋىلدى. ونىڭ سالماعى 3 كەلى 332 گرامم بولسا، بويى 53 سم بولدى.
«اناسىنىڭ اياعى اۋىر كەزدە قان قىسىمى جوعارى بولعان جانە قاعاناق سۋىنىڭ ازدىعىنان زارداپ شەككەن. ينفەكسيا كەزىندە قاننىڭ ۇيۋى بۇزىلىپ، دەنە قىزۋى كوتەرىلگەن جانە ىشەك جۇمىسى بۇزىلعان. قان ۇيۋىن قالىپقا كەلتىرۋ ءۇشىن قاننىڭ سۇيىق بولىگى قۇيىلدى. ءسابي وزدىگىنەن ەمە الماعاندىقتان، ءومىر ءسۇرۋ قالپىن ساقتاۋ ءۇشىن قورەكتىك زاتتار تامىر ارقىلى جىبەرىلدى. بالا ۇزاق ۋاقىت بويى دارىلىك ۇيقىدا بولىپ وزدىگىنەن دەم الا المادى. وكپە مەن ىشەكتەگى قابىنۋ پروسەسستەرى قايتقاننان كەيىن، تىنىس الۋى بىرتىندەپ قالىپقا كەلە باستادى»، – دەدى №4 پەرزەنتحانانىڭ بالالار ءبولىمىنىڭ مەڭگەرۋشىسى ولگا كۋدرياۆسيەۆا.
تۋا بىتكەن ەكى جاقتى پنيەۆمونيا باكتەريا، ۆيرۋس نەمەسە ساڭىراۋقۇلاقتارتان پايدا بولادى. ول ينفەكسيانىڭ انادان بالاعا ۇرىقجولداس ارقىلى نەمەسە بوسانۋ كەزىندە جۇعۋى سالدارىنان تۋادى.
بوسانۋ كەزىندە وتتەگى جەتىسپەۋشىلىگى، شالا تۋۋ نەمەسە اناسىندا باسقا دا مەديسينالىق ماسەلەلەردىڭ بولۋى سياقتى فاكتورلار تۋا بىتكەن ەكى جاقتى پنيەۆمونيانىڭ دامۋ ءقاۋپىن ارتتىرادى.
«بۇل جاعدايدا ءسابيدىڭ اناسىندا قاساعا سۋىنىڭ ازدىعى بولعان. ول تۋا بىتكەن ەكى جاقتى وكپە قابىنۋى ءقاۋپىن ارتتىرۋى مۇمكىن. ۇرىق قابىنىڭ ەرتە جارىلۋى، پلاسەنتانىڭ ماسەلەلەرى نەمەسە انا اعزاسىنا سۇيىقتىقتىڭ جەتىسپەۋى – ۇرىقتىڭ وكپەسى مەن باسقا دا اعزالارىنىڭ دامۋىنا قاجەتتى وتتەگى مەن قورەكتىك زاتتاردىڭ جەتىسپەۋىنە اكەپ سوعۋى مۇمكىن. ناتيجەسىندە، بالا ينفەكسيانى ءجيى جۇقتىرادى. سوندىقتان، جۇكتى ايەلدىڭ دەنساۋلىعىن باقىلاپ، تۇراقتى تۇردە تەكسەرىپ وتىرسا جۇكتى كەزدەگى كەز كەلگەن ماسەلەلەردى انىقتاۋعا بولادى»، – دەپ اتاپ ءوتتى الماتى قالاسى №4 پەرزەنتحانانىڭ بوسانۋ ءبولىمىنىڭ اكۋشەر-گينەكولوگ دارىگەرى ينديرا كەمالوۆا.
سونىمەن قاتار، دارىگەرلەر مۇنداي جاعدايدا ەمدەۋ ۇزاق ۋاقىت الۋى مۇمكىن ەكەنىن دە اتاپ ءوتتى.
«بالانىڭ جاعدايى اۋىر دەپ تانىلعان بولاتىن. اناسىنا پسيحولوگيالىق قولداۋ كورسەتىلدى. جاعدايى اۋىر بالالاردى ەمدەۋ كەزىندە بىزگە اتا-انانىڭ سەنىم ارتۋى ماڭىزدى. بۇل كوبىنە ەمنىڭ ءساتتى بولۋىنا كومەكتەسەدى. ينفەكسيانى جەڭىپ شىعۋعا اناسىنىڭ دارىگەرلەرگە دەگەن سەنىمى مەن ءۇمىتى وڭ ىقپال ەتتى»، – دەدى الماتى قالاسى №4 پەرزەنتحانا ديرەكتورىنىڭ ورىنباسارى ەكاتەرينا سامارسيەۆا.