شىمكەنتتە 24 جاستاعى ءۇمىتجان بالتابايەۆ بەسىنشى قاباتتان قۇلاپ قايتىس بولدى. ول جالدامالى قۇرىلىسشى بولعان.مارقۇمنىڭ جاقىندارى قۇرىلىس الاڭىندا قاۋىپسىزدىك تالاپتارى ساقتالماعانىن ايتىپ، كىنالىلەردىڭ جاۋاپقا تارتىلۋىنا تالاپ ەتىپ وتىر، - دەپ حابارلايدى اqshamnews.kz ءتىلشىسى “ينفورمبيۋرو” باعدارلاماسىنا سىلتەمە جاساپ.
ۇلىن جۇمىسىنا اتتاندىرعان فاتيما يبراگيموۆا ەكى ساعاتتان كەيىن بالاسى تۋرالى سۋىق حابار العان.
“ءوز قولىممەن جۇمىسقا جىبەردىم. ەكى ساعاتتان كەيىن بالاڭ قايتىس بولىپتى دەپ ەستىرتتى. مەن جىندى بولىپ قالايىن دەدىم. ەكى ساعاتتان كەيىن ءولىپ قالايىن دەپ. بەسىنشى ەتاجدان قۇلاعان. جەرگە تۇسكەن بە، باسقا جەرگە تۇسكەن بە ونى بىلمەيمىن. سونى مەن بىلگىم كەلىپ جاتىر. قالاي مەنىڭ بالام قالاي جەرگە تۇسكەن”، – دەيدى مارقۇمنىڭ اناسى.
قايعىلى وقيعا شىمكەنت قالاسىنداعى تۇرعىن ءۇي كەشەنى سالىنىپ جاتقان الاڭدا بولعان. ءۇمىتجان بالتابايەۆ مەردىگەر كومپانياعا كەلىسىمشارتسىز جالدانىپ، قارا جۇمىس ىستەگەن. مارقۇممەن بىرگە اۋىلداعى دوسى دا ەڭبەك ەتكەن. ول قۇرىلىس اۋماعىندا ەشقانداي تەحنيكالىق ءارى قاۋىپسىزدىك تالاپتارى ساقتالماعانىن ايتادى.
“باسپالداق ساڭىلاۋىنا كەتىپ بارا جاتقاندا اشىق جاتقان ليفت بار. سول جاققا بىلاي كوزىم ءتۇستى. اياق كيىم كورگەننەن كەيىن باسىمدى تىقسام، جاتىر. قاۋىپسىزدىك تەحنيكاسى جوق. مىسالى، باسقا نىساندارعا بارساڭ لەستنيسى ءپرووم جابىق بولادى. باسپالداق ساڭىلاۋى جابىق بولادى. وعان ادام كىرە المايدى”، – دەيدى ءۇمىتجاننىڭ دوسى ازيزبەك زاكيروۆ.
قارا جامىلعان وتباسى بۇل جاعدايدى قۇزىرلى ورگان وكىلدەرى تەكسەرىپ، كىنالى ادامداردى جاۋاپقا تارتسىن دەپ وتىر. ايتۋلارىنشا، ءتارتىپ ساقشىلارى ءمان-جايدى انىقتاۋعا اسىقپايدى. ءقازىر جۇمىسشى ءولىمى بويىنشا تەرگەۋ جۇرگىزىلىپ جاتىر ەكەن.
“پوليسيامەن اتالعان جازاتايىم وقيعا بويىنشا قىلمىستىق ءىس قوزعالدى. قازىرگى تاڭدا وقيعانىڭ بارلىق ءمان-جايىن انىقتاۋعا باعىتتالعان كەشەندى تەرگەۋ ءىس-شارالارى جۇرگىزىلىپ جاتىر. تەرگەۋ اياقتالعاننان كەيىن ءىس بويىنشا پروسەسسۋالدىق شەشىم قابىلدانادى”، – دەدى شىمكەنت قالاسى پوليسيا دەپارتامەنتىنىڭ باسپا ءسوز قىزمەتى.
قۇرىلىس كومپانياسىنىڭ وكىلدەرى سۇحبات بەرۋدەن باس تارتتى.
مارقۇم ءۇمىتجان بالتابايەۆ ۇيىندە 4 ۇلدىڭ تۇڭعىشى. 7 جاسىندا اكەسىنەن ايىرىلعان جاس جىگىت ءۇيىنىڭ جالعىز اسىراۋشىسى بولىپتى. تۋىستارى جىگىتتىڭ جۋىردا شاڭىراق كوتەرۋدى دە جوسپارلاپ جۇرگەنىن جەتكىزدى.