الماتى اكىمى دارحان ساتىبالدى جۇمىس ساپارى بارىسىندا اۋەزوۆ اۋدانىنداعى الەۋمەتتىك نىسانداردىڭ قۇرىلىس جانە قايتا جاڭعىرتۋ بارىسىن تەكسەردى.
بيىل شىلدەدە №2 الماتى مەملەكەتتىك پەداگوگيكالىق كوللەدجىنىڭ عيماراتىنا قوسالقى عيمارات سالۋ اياقتالۋى ءتيىس ەدى. الايدا «Golden City DS» ج ش س شارتتا بەلگىلەنگەن مەرزىمگە ۇلگەرمەدى. وسىعان بايلانىستى قۇرىلىس باسقارماسى سوتقا تالاپ ارىز بەرىپ، مىندەتىنە سالعىرت قاراعان مەردىگەر رەتىندە قاتىسۋشىلار قاتارىنان شىعارۋ جانە ايىپپۇل ءوندىرۋ ماسەلەسىن كوتەردى.
جوبا بويىنشا نەگىزگى عيماراتپەن گالەرەيا ارقىلى جالعاناتىن ەكى قوسالقى نىسان سالۋ قاراستىرىلعان. وندا مۋلتيمەديالىق كابينەتتەرى بار وقۋ كورپۋسى، زەرتحانا، اكت جانە سپورت زالى، اسحانا ورنالاسادى. سونىمەن قاتار ستاديون جاڭارتىلىپ، فۋتبول الاڭى، ۆولەيبول جانە باسكەتبول الاڭدارى سالىنۋدا.
الماتى اكىمى مەرزىمدى بۇزعان مەردىگەرلەردىڭ قالا جوبالارىنا قاتىسپايتىنىن، ال جەكەلەگەن جاعدايدا قۇقىق قورعاۋ ورگاندارى ارقىلى جاۋاپكەرشىلىككە تارتىلاتىنىن اتاپ ءوتتى.
«كومپانيا بۇل نىساندى تولىق اياقتامايىنشا، جاڭا تەندەرلەرگە قاتىسپايدى. قالا قۇرىلىسى باقىلاۋ باسقارماسى ءماسليحات دەپۋتاتتارىمەن بىرگە جۇمىستاردىڭ ساپاسى مەن قارقىنىن باقىلاۋعا ءتيىس. ەگەر زاڭبۇزۋشىلىق انىقتالسا، كومپانيانى ليسەنزياسىنان ايىرۋ قاجەت. سىزدەر نىساندى قاراشا ايىنىڭ سوڭىنا دەيىن تاپسىرامىز دەپ ۋادە بەردىڭىزدەر – ءبىز اپتا سايىن تەكسەرىپ وتىرامىز»، – دەدى دارحان ساتىبالدى.
سونداي-اق قالا باسشىسى «التىن بەسىك» شاعىناۋدانىندا 120 ورىندىق بالاباقشا قۇرىلىسىنىڭ بارىسىمەن تانىستى. جوبانىڭ جۇزەگە اسۋى سىرتقى ينجەنەرلىك جەلىلەردىڭ تراسساسىن تۇزەتۋ قاجەتتىلىگىنە بايلانىستى سوزىلىپ كەتكەن. العاشقى جوسپار وزگەرتىلدى، سەبەبى قازاندىق عيماراتى تولە بي كوشەسىندەگى جوباعا كەدەرگى كەلتىردى. نىساننىڭ تولىق اياقتالۋى وسى جىلدىڭ قاراشاسىنا جوسپارلانعان.
بۇدان بولەك، اكىم №10 شاعىناۋداندا سالىنعان 160 ورىندىق بالاباقشانى ارالادى. الماتى اكىمى جاۋاپتى باسقارمالارعا مەكتەپكە دەيىنگى مەكەمەنى ساپالى جابدىقتاۋ ماسەلەسىنە باسا نازار اۋدارۋدى تاپسىردى. بالاباقشا بارلىق قاجەتتى قۇجات دايىن بولعان سوڭ جۇمىسىن باستايدى.