بۇگىن وقۋ-اعارتۋ ءمينيسترى حالىقارالىق ۇيىمداستىرۋ كوميتەتىنىڭ وكىلدەرىمەن كەزدەستى.
IBO حالىقارالىق ۇيىمداستىرۋ كوميتەتىنىڭ ءتوراعاسى لەنكا ليبۋسوۆانىڭ ايتۋىنشا، قازاقستاننىڭ مۇنداي بەدەلدى وليمپيادانى وتكىزۋ ورنى رەتىندە تاڭدالۋى كەزدەيسوقتىق ەمەس، وعان قازاقستاندىق وقۋشىلاردىڭ جوعارى حالىقارالىق يميدج قالىپتاستىرۋى سەبەپ بولدى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
«جىل سايىن قازاقستاندىق وقۋشىلار الەمدىك ارەنادا جوعارى كورسەتكىشتەردى كورسەتىپ كەلەدى. بارلىق جەتىستىكتەردى ەسكەرە وتىرىپ، حالىقارالىق ۇيىمداستىرۋ كوميتەتى بيولوگيا پانىنەن وتەتىن حالىقارالىق وليمپيادانى 2024 جىلى استانادا وتكىزۋ تۋرالى شەشىم قابىلدادى. 80 ەلدەن 330-عا جۋىق ەڭ ۇزدىك جاس بيولوگ قاتىسادى دەپ كۇتىلۋدە»، - دەدى وليمپيادانىڭ حالىقارالىق ۇيىمداستىرۋ كوميتەتىنىڭ ءتوراعاسى.
وقۋ-اعارتۋ ءمينيسترى مۇنداي ايتۋلى شارانىڭ وتكىزىلۋى – ەلىمىزدىڭ بۇكىل وقۋ-اعارتۋ سالاسىنىڭ جەتىستىگى ءارى بەدەلى ەكەنىن ايتتى.
«قۋانتارلىعى، وسىنداي بەدەلدى الەمدىك وليمپيادالاردا ءبىزدىڭ وقۋشىلارىمىزدىڭ رەيتينگى جىل سايىن ءوسىپ كەلەدى. ءبىلىم سالاسىنداعى ەڭ ءىرى شارالاردىڭ ءبىرى – بيولوگيادان حالىقارالىق IBO–2024 وليمپياداسىنىڭ ءبىزدىڭ ەلدە ءوتۋى سونىڭ دالەلى بولماق. بۇل ءبىلىم بەرۋ ساپاسىن ارتتىرۋعا جاسالاتىن تاعى ءبىر قادام»، – دەدى عاني بەيسەمبايەۆ.
بيولوگيادان حالىقارالىق وليمپيادا (IBO) - ءتۇرلى ەلدەردەگى ورتا ءبىلىم بەرۋ ۇيىمدارىنىڭ وقۋشىلارى اراسىنداعى ەڭ جوعارى دەڭگەيدەگى جارىس سانالادى. ماقساتى – بيولوگيالىق زەرتتەۋلەرگە قىزىعۋشىلىقتى ارتتىرۋ، دارىندى وقۋشىلاردىڭ يدەيالارىن ناسيحاتتاۋ جانە ءوزارا تاجىريبە الماسۋلارىنا مۇمكىندىك جاساۋ.