پيانيست ءارى كومپوزيتور كارينا يزمايىلوۆا اتا-اجەسى عازيزا جۇبانوۆا مەن ءازىربايجان مامبەتوۆتىڭ كەڭسايداعى بەيىتىندە ۇرلىق جاسالعانىن ايتتى.
كارينا يزمايىلوۆانىڭ سوزىنشە، كسرو حالىق ارتىستەرى، كومپوزيتور عازيزا جۇبانوۆا مەن رەجيسسەر ءازىربايجان مامبەتوۆ جەرلەنگەن كەڭساي زيراتىنان 2016 جىلى ەسكەرتكىشتەر ۇرلانعان. ءۇش جاسىندا قايتىس بولعان ولاردىڭ كەنجە ۇلى احاننىڭ قابىرىندەگى ەسكەرتكىش، ياعني قولادان جاسالعان قۇلىننىڭ ءمۇسىنى عانا ۇرلانباعان. بۇل وتباسى سول كەزدە ءوز قاراجاتىنان ەسكەرتكىشتەردى قالپىنا كەلتىرىپتى. ءبىراق ۇرىلار تابىلماعان. بىرنەشە كۇن بۇرىن قابىردە تاعى دا ۇرلىق جاسالعان. بۇل جولى ۇلى تۇلعالاردىڭ كەنجەسىنىڭ قابىرىندە تۇرعان قۇلىننىڭ ءمۇسىنى ۇرلانعان، دەپ حابارلايدى Almaty-akshamy.kz.
«ءبىز ءۇشىن بۇل تراگەديا دەۋگە بولادى. ءبىراق بارىنەن بۇرىن ۇلى قايراتكەرلەر ءازىربايجان مامبەتوۆ پەن عازيزا جۇبانوۆانىڭ ءوز كۇشىمىزبەن قالپىنا كەلتىرگەن ەسكەرتكىشتەرىن ۇرلاپ كەتە مە دەپ قورقامىز. مۇنىڭ ءبارى ءبىزدىڭ وتباسىمىز ءۇشىن، وسى ۇلى ادامداردىڭ ۇرپاقتارى ءۇشىن سوققى بولىپ ءتيىپ وتىر. ونىڭ ۇستىنە وسىنداي ەڭ قاسيەتتى جەر - زيراتتا ۇرلىق جاساۋعا باتىلى بارعاندارى تاڭعالدىرادى. كەڭساي زيراتىنىڭ باسشىلىعىنا، الماتى قالاسى اكىمدىگى مەن پروكۋراتۋراسىنا مىنا سۇراقپەن جۇگىنەمىز: وتانىنا ەرەن ەڭبەگى سىڭگەن ادامدار جەرلەنگەن ورتالىق زيرات نەگە دۇرىس قورعالمايدى؟»- دەيدى كارينا ىسمايىلوۆا الەۋمەتتىك جەلىدەگى جازباسىندا.
كارينا ەسكەرتكىشتەر كەڭساي زيراتىنىڭ ورتالىعىندا، كۇزەت بەكەتى مەن مولدانىڭ ءۇيىنىڭ ماڭىندا ورنالاسقانىن ايتتى. پوليسيا مارقۇمداردىڭ تۋىستارىنىڭ ءوتىنىشىن قابىلداپتى. ءبىراق كىنالىلەردى تاپپاعان. زيرات باسشىلىعى مەن اكىمدىك بار ماسەلەنى جەكە كۇزەت ۇيىمىنا سىلتەپ وتىر ەكەن.
الماتى اكىمدىگى مالىمەتىنشە، "مامانداندىرىلعان عۇرىپتىق قىزمەتتەر كومبيناتى" ج ش س قالا زيراتتارىن كۇتىپ ۇستاۋ قىزمەتىن كورسەتەدى. جەرلەۋ قاعيداسى بويىنشا جەرلەۋگە بولىنگەن ۋچاسكە اۋماعىنداعى قۇرىلىستار تۋىستارىنىڭ نەمەسە ولاردى بەلگىلەگەن مەكەمەلەردىڭ مەنشىگى سانالادى ەكەن. ياعني، ج ش س ولارعا جاۋاپتى ەمەس.
ال الماتى قالاسى جەتىسۋ اۋدانى اكىمىنىڭ اپپاراتى جەرلەۋ ورىندارىن كۇتىپ ۇستاۋ جانە زيراتتاردى كۇزەتۋ جونىندەگى بيۋدجەتتىك باعدارلامانىڭ اكىمشىسى سانالادى. "سكرۋ" ج ش س جىل سايىن جەتىسۋ اۋدانى اكىمىنىڭ اپپاراتى وتكىزەتىن كونكۋرس نەگىزدە مەملەكەتتىك ساتىپ الۋ شارتىنا سايكەس قىزمەت كورسەتەدى. اۋدان اكىمدىگى جەرلەۋ ورىندارىن كۇزەتۋگە كونكۋرس وتكىزەدى. زيراتتاردى كۇزەتۋ قىزمەتىن جەكە كۇزەت اگەنتتىگى كورسەتەدى. 2023 جىلى Star Wolf Security ج ش س كۇزەتەدى.
«سونىمەن قاتار، كەيىنگى جىلدارى الماتى قالاسى زيراتتارىندا ۆانداليزم، ۇرلىق دەرەكتەرى كوبەيگەن. كۇزەتكە بولىنگەن قاراجات ەكى بەكەت بويىنشا عانا ەسەپتەلگەن. قورعالاتىن نىساننىڭ جالپى اۋدانى 197،2 گەكتار بولعاندىقتان، بارلىق جەردى باقىلاۋدا ۇستاۋ مۇمكىن ەمەس. دەگەنمەن زيراتتار مەن كۇزەت ۇيىمىنىڭ قىزمەتكەرلەرى بىرنەشە رەت ۇرلىق دەرەكتەرىنىڭ جولىن كەسىپ، بىرنەشە رەت قىلمىسكەرلەر ۇستالىپ، پوليسيا قىزمەتكەرلەرىنە تاپسىرىلدى»، - دەدى اكىمدىك وكىلى.
2024 جىلى تۇندە زيرات ىشىنە قوسىمشا كۇزەت جانە پاترۋلدەۋ بەكەتتەرىن قوسۋ ارقىلى كوبىرەك قارجى ءبولۋ جوسپارلانىپ وتىر ەكەن. سونىمەن قاتار، جەتىسۋ اۋدانىنىڭ اكىمدىگى 750 كامەرا ورناتپاق. سونىڭ ىشىندە "كەڭساي 1"جانە "كەڭساي 2" زيراتتارىنا ورناتۋ جوسپارلانىپ وتىر. بۇل ءۇشىن الماتى سيفرلاندىرۋ باسقارماسىنا ءوتىنىم جىبەرىلىپتى.
ال الماتى پوليسيا دەپارتامەنتى مالىمەتىنشە، بۇل دەرەككە قاتىستى مەدەۋ اۋدانىنىڭ پوليسيا باسقارماسى جانىنداعى پوليسيا ءبولىمى ق ر قىلمىستىق كودەكسىنىڭ 188-بابى (بوتەننىڭ مۇلكىن ۇرلاۋ) بويىنشا سوتالدى تەرگەۋ جۇرگىزىپ جاتىر. ارنايى جەدەل تەرگەۋ توبى قۇرىلعان. سونىمەن قاتار، مەتالدى قابىلداۋ ورىندارى تەكسەرىلەتىنى ايتىلدى.
قۇزىرلى ورگاندار مالىمەتىنشە، جىل باسىنان بەرى كەڭسايدا ۇرلىق جاسادى دەگەن كۇدىكپەن ءۇش ادام ۇستالىپتى.