مەملەكەت باسشىسىنىڭ تاپسىرماسىنا سايكەس، ەلىمىزدە باسقارۋشىلاردىڭ جاڭا بۋىنىن قالىپتاستىرۋعا باعىتتالعان «ءبىلىم بەرۋدەگى 1000 كوشباسشى» ستراتەگيالىق جوباسى جۇزەگە اسىرىلۋدا.
جوبا حالىقارالىق وزىق تاجىريبەگە نەگىزدەلگەن: كوپتەگەن ەلدەردە مەكتەپ ديرەكتورلارىن تاعايىنداماس بۇرىن ولاردى ارنايى دايارلاۋ مىندەتتى تالاپ سانالادى. قاتىسۋشىلار وقۋدان ءوتىپ، ۇزدىك ءبىلىم بەرۋ ۇيىمدارىندا تاعىلىمدامادان وتەدى جانە تالىمگەرلىك قولداۋمەن قامتىلادى. بۇل باسقارۋشىلىق قابىلەتتەردى جۇيەلى تۇردە دامىتۋعا جانە سەنىمدى شەشىم قابىلداي الاتىن جەتەكشىلەردى قالىپتاستىرۋعا مۇمكىندىك بەرەدى.
بۇگىنگى تاڭدا رەسپۋبليكالىق كادرلىق رەزەرۆكە 583 پەداگوگ ەنگىزىلىپ، ولاردىڭ 397ء-سى كونكۋرستان تىس نەگىزدە باسشىلىق قىزمەتكە تاعايىندالدى. تەك 2024 جىلدىڭ وزىندە 36 رەزەرۆيست جاڭا ۇلگىدەگى «كەلەشەك مەكتەپتەرى» جوباسى اياسىندا سالىنعان مەكتەپتەردىڭ ديرەكتورلارى بولدى. ⠀
جوباعا قاتىسۋشىنىڭ ءبىرى – №290 جايلى مەكتەپتىڭ ديرەكتورى ءمولدىر سماحانوۆا. ول بارلىق كەزەڭنەن ءوتىپ، باعدارلاماعا ساي جان-جاقتى دايىندىقتان ءوتتى. باسشىلىققا تاعايىندالماس بۇرىن زاماناۋي باسقارۋ تاسىلدەرىن مەڭگەرىپ، كاسىبي داعدىلارىن جەتىلدىردى.
«بۇل جوبا مەنىڭ ديرەكتور قىزمەتىنە دەگەن كوزقاراسىمدى مۇلدە وزگەرتتى. قازىرگى زامانعى مەكتەپكە تەك باسقارۋشى ەمەس، ۇجىمدى ىنتالاندىرىپ، مۇعالىمدەردىڭ كاسىبي دامۋىنا جانە وقۋشىلاردىڭ قابىلەتىن تولىق اشۋعا مۇمكىندىك بەرەتىن كوشباسشى قاجەت. «كەلەشەك مەكتەپتەرى» مودەلى وسىنداي جاڭا باسقارۋ مادەنيەتىن قالىپتاستىرادى»، – دەدى جوبا تۇلەگى.
پرەزيدەنتتىك جاستار كادرلىق رەزەرۆى تاجىريبەسىنە نەگىزدەلگەن بۇل جوبا 2023 جىلدان باستاپ قازاقستان رەسپۋبليكاسى وقۋ-اعارتۋ مينيسترلىگىنىڭ باستاماسىمەن جۇزەگە اسىرىلىپ كەلەدى. قاتىسۋشىلاردى ىرىكتەۋ پروسەسى بەس كەزەڭنەن تۇرادى: تەستىلەۋ، وقىتۋ، تاعىلىمداما، قورىتىندى باعالاۋ جانە سۇحبات. 2024 جىلى 2،5 مىڭنان استام ۇمىتكەردىڭ اراسىنان كاسىبي دايارلىق كۋرسىنا 433 كانديدات ىرىكتەلىپ الىندى.