استاناداعى «كەلەشەك» مەكتەپتەرىنىڭ بىرىندە ەرەكشە ءبىلىم بەرۋ جوباسى – «ءتىرى تابيعات» كابينەتى اشىلدى. مۇندا وقۋشىلار سيرەك كەزدەسەتىن باۋىرىمەن جورعالاۋشىلار مەن ومىرتقاسىز جانۋارلاردى ءقاۋىپسىز جاعدايدا باقىلاپ، زەرتتەي الادى. الداعى ۋاقىتتا مۇنداي كابينەتتەر ەلوردانىڭ تاعى 100 مەكتەبىندە اشىلماق، دەپ حابارلايدى قالا اكىمدىگىنىڭ رەسمي سايتى.
«ءتىرى تابيعات» كابينەتى – ەكولوگيالىق مادەنيەتتى قالىپتاستىراتىن، بيولوگيا جانە جاراتىلىستانۋ پاندەرىنە قىزىعۋشىلىقتى ارتتىراتىن، زەرتتەۋشىلىك داعدىلاردى دامىتاتىن وقۋ-تاجىريبەلىك ورتا. ول وقۋ باعدارلاماسىنا تولىق ينتەگراسيالانعان جانە 5–11 سىنىپتارعا ارنالعان ماڭىزدى ءبىلىم كەڭىستىگىنە اينالعان.
كابينەتتە رەپتيليالار، ورمەكشىتارىزدىلەر، ومىرتقاسىزدار جانە جابىق ەكوجۇيە ۇلگىلەرى ورنالاستىرىلعان. بارلىق جانۋارلارعا قاجەتتى جاعداي – تەرراريۋمدار، جارىق، تەمپەراتۋرا جانە ىلعالدىلىق جۇيەلەرى قامتاماسىز ەتىلگەن. بۇل وقۋشىلارعا ءتىرى اعزالاردىڭ تىرشىلىگىن ءقاۋىپسىز باقىلاۋعا مۇمكىندىك بەرەدى.
جوبانىڭ نەگىزگى ەرەكشەلىگى – تاجىريبە ارقىلى وقىتۋ. بالالار زەرتحانالىق جۇمىستار جاسايدى، جانۋارلاردىڭ مىنەز-قۇلقىن باقىلايدى، عىلىمي كۇندەلىك جۇرگىزەدى. ءقازىر وقۋشىلار يەمەن حامەلەونى جۇمىرتقالارىنىڭ ينكۋباسياسىن زەرتتەپ، دامۋدىڭ كەزەڭدەرىن باقىلاۋدا.
سونىمەن بىرگە فلوراريۋمدار قۇرۋ جۇمىستارى جۇرگىزىلەدى: وقۋشىلار شاعىن ەكوجۇيە جاسايدى، وسىمدىكتەر وتىرعىزادى، جارىق پەن ىلعالدى رەتتەيدى. بۇل ولارعا تابيعي پروسەستەر – ىلعال اينالىمى، توپىراق ءتۇزىلۋى، وسىمدىكتەر مەن ميكرواعزالاردىڭ ءوزارا بايلانىسى تۋرالى تۇسىنىكتى تەرەڭدەتۋگە كومەكتەسەدى.
جالپى، «ءتىرى تابيعات» كابينەتى – ءبىلىم بەرۋ، تاربيە جانە عىلىمي-زەرتتەۋ باعىتتارىن بىرىكتىرگەن ماڭىزدى جوبا. ول وقۋشىلاردىڭ بيولوگياعا قىزىعۋشىلىعىن كۇشەيتىپ قانا قويماي، تابيعاتتى زەرتتەۋ مەن باقىلاۋ داعدىلارىن قالىپتاستىرىپ، جاس زەرتتەۋشىلەردىڭ تانىم كوكجيەگىن كەڭەيتۋدە.