دارحان ساتىبالدى مەردىگەرلەردى شارتتىق مەرزىمدەردىڭ بۇزىلۋىنىڭ سالدارى تۋرالى ەسكەرتتى، دەپ حابارلايدى aqshamnews.kz
الماتى اكىمى دارحان ساتىبالدى جۇمىس ساپارى بارىسىندا كەزەكتە تۇرعان ازاماتتارعا ارنالعان تۇرعىن ۇيلەر مەن بىرنەشە مەكتەپ قۇرىلىسىنىڭ بارىسىمەن تانىستى.
ناۋرىزباي اۋدانىندا 340 ورىندىق مەكتەپ-ينتەرناتتىڭ قۇرىلىسى ءجۇرىپ جاتىر. جوبادا وقۋ جانە اكىمشىلىك كابينەتتەر، اسحانا، باسسەينى بار سپورت زالدارى، وقۋ زالى بار كىتاپحانا جانە جاتىن بولمەلەرى قاراستىرىلعان 7 بلوك بار.
قازىرگى ۋاقىتتا ارلەۋ جۇمىستارى، اۋماقتى كوگالداندىرۋ جانە تەحنولوگيالىق جابدىقتاردى جەتكىزۋ جالعاسۋدا. نىساننىڭ دايىندىق دەڭگەيى – 90%. الايدا جۇمىس كەستەسىنەن 3 ايعا كەيىن قالۋ بار.
اكىم بۇل مەكتەپتىڭ ەرەكشە ماڭىزىن اتاپ ءوتتى، سەبەبى مۇندا الەۋمەتتىك وسال ساناتتاعى بالالار وقىپ، تۇرادى.
«نىسان بيىل اياقتالۋى جانە ساپاسى تالاپقا ساي بولۋعا ءتيىس. ايتپەسە، ءبىز سوت تارتىبىمەن شارا قابىلداۋعا ءماجبۇر بولامىز. جالپى، قالا كاسىبي قۇزىرەتى، زاماناۋي تەحنيكاسى جانە بىلىكتى ماماندارى بار كومپانيالارمەن جۇمىس ىستەۋگە مۇددەلى. ال شارتتىق مەرزىم مەن قۇرىلىس نورمالارىن بۇزاتىن مەردىگەرلەر جاڭا جوبالارعا جىبەرىلمەيدى»، — دەدى دارحان ساتىبالدى.
ودان كەيىن قالا اكىمى بوستاندىق اۋدانىنداعى №73 مەكتەپ-گيمنازياسىنا سالىنىپ جاتقان قوسىمشا عيماراتتىڭ جۇمىسىن كوردى. قۇرىلىس بيزنەستىڭ الەۋمەتتىك جاۋاپكەرشىلىگى اياسىندا جەكە قاراجات ەسەبىنەن جۇرگىزىلۋدە.
اۋدانى 6،6 مىڭ شارشى مەتر بولاتىن ءۇش قاباتتى عيماراتتا وقۋ كابينەتتەرى، زەرتحانالار جانە سپورت زالى قاراستىرىلعان. بۇل وقۋشىلار ءۇشىن ءقاۋىپسىز جانە قولايلى وقۋ ورتاسىن قامتاماسىز ەتەدى. قۇرىلىستى كەلەر جىلدىڭ قاڭتار ايىنىڭ سوڭىندا اياقتاۋ جوسپارلانعان.
سونداي-اق جۇمىس ساپارى بارىسىندا اكىم قالقامان-2 شاعىناۋدانىنداعى كوپپاتەرلى تۇرعىن ۇيلەردىڭ قۇرىلىس الاڭىندا بولدى. جوبا اياسىندا قالاداعى كەزەكتە تۇرعان ازاماتتارعا ارنالعان 594 پاتەر سالىنۋدا. جۇمىستى بيىل اياقتاۋ جوسپارلانعان. كەيىن پاتەرلەر ودان ءارى ءبولۋ ءۇشىن كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ بالانسىنا بەرىلەدى.