سولتۇستىك قازاقستان وبلىسىندا مەملەكەت باسشىسى جاريالاعان «تازا قازاقستان» ەكولوگيالىق اكسياسى اياسىندا «بالىق اۋلاۋ تورلارى تەڭىزى. 1ء-بولىم» دەرەكتى ءفيلمىنىڭ ەكوكورسەتىلىمى ءوتتى. ءىس-شارانى وبلىستىق جاستار رەسۋرستىق ورتالىعى ەرىكتىلەردىڭ فرونت-وفيسىمەن بىرلەسىپ ۇيىمداستىردى.
كينوكورسەتىلىمنىڭ ماقساتى – جاستاردىڭ ەكولوگيالىق ساۋاتتىلىعىن ارتتىرۋ، سۋ ايدىندارىنىڭ لاستانۋى مەن انتروپوگەندىك اسەردىڭ سالدارىنا نازار اۋدارتۋ. فيلم كاسپيي تەڭىزىنىڭ ەكولوگيالىق ماسەلەلەرىن كوتەرىپ، تابيعاتتى قورعاۋدا ءار ادامنىڭ جاۋاپكەرشىلىگى ماڭىزدى ەكەنىن كورسەتەدى.
«ۆيزۋالدى ونەر مەن اشىق ديالوگ ارقىلى تابيعاتقا جاۋاپتى كوزقاراس قالىپتاستىرۋ – باستى ماقساتىمىز. مۇنداي فيلمدەر تەك اقپارات بەرمەي، ناقتى ارەكەتكە شابىت بەرەدى»، – دەدى سقو ەرىكتىلەر ءفرونت-وفيسىنىڭ ۇيلەستىرۋشىسى عابباس الماگۇل.
كورسەتىلىمنەن كەيىن ستۋدەنتتەر مەن ەرىكتىلەر «سۇراق–جاۋاپ» فورماتىندا قالدىقتاردى سۇرىپتاۋ، پلاستيكتى قايتا وڭدەۋ، جەرگىلىكتى ەكو-باستامالارعا قاتىسۋ ماسەلەلەرىن تالقىلادى. قاتىسۋشىلار جەكە ەكولوگيالىق ءىزدى ازايتۋ جولدارى مەن وڭىردەگى تابيعاتتى قورعاۋ شارالارى تۋرالى سۇراقتار قويدى.
ستۋدەنت دينارا تايمانوۆا: «ءفيلمدى كورگەن سوڭ ءارى مۇڭايدىم، ءارى شابىتتاندىم. لاستانۋدىڭ اۋقىمى قورقىنىشتى. ءبىراق تازالىققا شىعۋ سياقتى شاعىن قادامدار دا بىرەۋدىڭ ءومىرىن ساقتاپ قالۋى مۇمكىن ەكەنىن ءتۇسىندىم»، – دەدى.
ۇيىمداستىرۋشىلار ۆيزۋالدى فورمات جاستارعا ەكولوگيالىق سىن-قاتەرلەردى جاقسىراق تۇسىنۋگە كومەكتەسەتىنىن اتاپ ءوتتى. مۇنداي كەزدەسۋلەردەن كەيىن ەرىكتىلەر قاتارى ارتىپ، جاستار ءوز ەكو-باستامالارىن ۇسىنۋعا بەلسەندى كىرىسەدى.
«ءبىز ءۇشىن «جاسىل كينوتەاتر» تۇراقتى داستۇرگە اينالۋى ماڭىزدى. اعارتۋ، تارتۋ جانە ناقتى ارەكەت ارقىلى عانا قورشاعان ورتانى بىرگە تازارتا الامىز»، – دەپ تۇيىندەدى عابباس الماگۇل.