12 مامىردان باستاپ بەس جاسقا دەيىنگى بالالارى بار اتا-انالار «كەلەشەك» جۇيەسى اياسىندا وتباسى بانكىندە AQYL ءبىلىم بەرۋ جيناق سالىمىن اشا الادى.
ەلىمىزدەگى مەكتەپ جاسىنا دەيىنگى بالالار سانى 2 ميلليوننان اسادى، بۇل حالىقتىڭ 10 پايىزى. ولاردىڭ ءبىلىم الۋىنا قولداۋ كورسەتۋ ماقساتىندا «كەلەشەك» جۇيەسى ەنگىزىلدى. بۇل جۇيە وتباسىلارعا بالالاردىڭ وقۋىنا قارجى جيناۋعا مۇمكىندىك بەرەدى.
Energyprom مالىمەتىنشە، «كەلەشەك» جۇيەسى بەس جاستان باستاپ بالالاردى قامتي وتىرىپ، مەملەكەتتىك باستاپقى ءبىلىم بەرۋ كاپيتالىن، جىل سايىنعى مەملەكەتتىك سىياقىنى جانە ينۆەستيسيالىق تابىستى قاراستىرادى. باعدارلامانىڭ سەرىكتەستەرى رەتىندە مىنا بانكتەر كورسەتىلگەن: وتباسى بانكى، Halyk Bank، Jusan Bank، نۇربانك، ۆتب بانكى؛ سونداي-اق مىنا ساقتاندىرۋ كومپانيالارى: «ەۆرازيا» ساقتاندىرۋ كومپانياسى، Freedom Finance Life ءومىردى ساقتاندىرۋ كومپانياسى، «حالىك-Life»، Standard Life، جانە Nomad Life.
بۇل شوتقا مەملەكەت تاراپىنان باستاپقى كاپيتال اۋدارىلادى – 60 اەك (235 920 تەڭگە)، ال اتا-انا قامقورلىعىنسىز قالعان بالالار ءۇشىن – 120 اەك (471 840 تەڭگە). ەگەر بالا 2025 جىلدىڭ باسىنا دەيىن بەس جاستان اسقان بولسا، باستاپقى كاپيتال قاراستىرىلمايدى. ماڭىزدى ەسكەرتۋ: «كەلەشەك» بويىنشا جينالعان قاراجاتتى «ۇلتتىق قور – بالالارعا» جوباسىنداعى قارجىمەن بىرىكتىرۋگە بولادى.
باعدارلاما 5 جاستان باستاپ 18 جاسقا دەيىنگى كەزەڭدە بالالاردىڭ اتىنا قارجى جيناۋدى تۇراقتى تۇردە جۇرگىزۋگە ارنالعان. جينالعان قاراجاتتى ەل ىشىندە دە، شەتەلدە دە ءبىلىم الۋعا – جوعارى، تەحنيكالىق جانە كاسىپتىك بىلىمگە – پايدالانۋعا بولادى.
مەملەكەتتەن باستاپقى كاپيتال: بيىل 5 جاسقا تولعان بالالارعا – 60 اەك (235 920 تەڭگە)؛ اتا-انا قامقورلىعىنسىز قالعان بالالارعا – 120 اەك (471 840 تەڭگە)؛ ەكىنشى دەڭگەيلى بانكتىڭ سىياقىسى نەمەسە ءومىردى ساقتاندىرۋ كومپانياسىنىڭ ينۆەستيسيالىق تابىسى؛ جىل سايىن 5–7% مولشەرىندە مەملەكەتتىك سىياقى تولەنەدى. شوت اشىلعاننان كەيىن اتا-انالار بالالار ءۇشىن جىل سايىنعى ەڭ تومەنگى جارنانى ەنگىزۋى كەرەك: سۋسن بالالارى ءۇشىن – 12 اەك (ايىنا شامامەن 4 مىڭ تەڭگە)، قالعان بالالار ءۇشىن – 24 اەك.