ەلىمىزدە سپورت سالاسىن رەفورمالايتىن جاڭا زاڭ كۇشىنە ەندى، دەپ حابارلايدى aqshamnews.kz
قارجى بولىنەتىن كەزدە ەلدەگى ينفلياسيا باعامى ەسكەرىلەدى. دەنە شىنىقتىرۋ جانە سپورت سالاسىن رەفورمالاۋعا باعىتتالعان جاڭا زاڭ كۇشىنە ەندى. بۇدان بولەك 60-تان استام سپورت تۇرىنە باسىمدىق بەرىلەدى. جوسپار بويىنشا سونىڭ تەڭ جارتىسى بارلىق وڭىردە داميدى. اراسىندا وليمپيادا، پاراليمپيادا، سۋردوليمپيادا، ازيا جانە پارا ازيا ويىندارى باعدارلاماسىنا ەنگەن، سونداي-اق ۇلتتىق سپورت تۇرلەرى كىرەدى. سپورت فەدەراسيالارىنا دا تالاپ كۇشەيەدى. بىرلەستىكتەر ۇلتتىق اككرەديتتەۋدەن ءوتۋى كەرەك.
پارا اتلەتتەر، ونىڭ ىشىندە ءى توپتاعى مۇگەدەكتىگى بار سپورتشىلاردىڭ سۇيەمەلدەۋشىلەرى زاڭمەن قورعالادى. ال سپورت ۇيىمدارىنىڭ باسشىلارىنا 5 جىل سايىن روتاسيا جاسالاتىن بولادى. تۋريزم جانە سپورت مينيسترلىگىنىڭ وكىلدەرى زاڭعا ەنگىزىلگەن تۇزەتۋلەردى ىسكە اسىرۋعا كىرىستىك دەپ حابارلادى.