سوڭعى ءۇش جىلدا قازاقستاندا 65 جاستان اسقان جۇمىس ىستەيتىن زەينەتكەرلەردىڭ سانى 26،6%-عا ءوستى.
ۇلتتىق ستاتيستيكا بيۋروسىنىڭ مالىمەتىنشە، بقو، تۇركىستان وبلىسى، استانا جانە شىمكەنت قالالارىندا 65 جاستان اسقان جۇمىس ىستەيتىن زەينەتكەرلەر جوق ەكەنى بەلگىلى بولدى، دەپ حابارلايدى Almaty-akshamy.kz.
2022 جىلدىڭ ءۇشىنشى توقسانىنىڭ قورىتىندىسى بويىنشا، 65 جاستان اسقان جۇمىس ىستەيتىن زەينەتكەرلەر سانى ءار وڭىردە ءار قيلى. نەگىزگى ءۇردىس: وسى ساناتتاعى قازاقستاندىقتاردىڭ كوپشىلىگى سولتۇستىك جانە ورتالىق وڭىرلەردە تۇرادى. رەسمي ەسكەرىلگەندەردىڭ جارتىسىنا جۋىعى قوستاناي جانە اقمولا وبلىستارىندا. سونداي-اق قاراعاندى، پاۆلودار جانە سولتۇستىك قازاقستان وبلىستارىندا دا بارشىلىق. قالعان وڭىرلەردە كورسەتكىشتەر ايتارلىقتاي تومەن، ال ەڭ از قىزىلوردا جانە ماڭعىستاۋ وبلىستارىندا تۇرادى.
وسى جاس ساناتىنداعى بارلىق جۇمىس ىستەيتىن زەينەتكەرلەردىڭ 75%-دان استامى اۋىل، ورمان جانە بالىق شارۋاشىلىعىندا جۇمىس ىستەيدى. ەكونوميكالىق قىزمەتتىڭ بارلىق باسقا تۇرلەرىنىڭ كورسەتكىشتەرى ولارمەن سالىستىرعاندا از. ولاردىڭ 4%-ى قويمالاردا نەمەسە جۇرگىزۋشى بولىپ جۇمىس ىستەسە،3 مىڭ ادام — دارىگەر مەن باسقا دا مەديسينا قىزمەتكەرلەرى. قۇرىلىس جانە ونەركاسىپ سياقتى قيىن سالالاردا 65 جاستان كەيىن دە جۇمىس ىستەپ جاتقان ازاماتتار بارشىلىق.
ءبىراق مەملەكەتتىك ورگاندارداعى باسشىلار مەن الەۋمەتتىك قامسىزداندىرۋ قىزمەتكەرلەرى، كەرىسىنشە، كەمىدى: 2019 جىلدىڭ ءۇشىنشى توقسانىمەن سالىستىرعاندا 40،4%-عا ازايدى.
بىلتىر ەلىمىزدە 65 جاستان اسقان جوعارى باسشىلار، زاڭ شىعارۋشىلار مەن مەملەكەتتىك قىزمەتشىلەر سانى بار بولعانى 58 ادام بولدى. قر-دا قارتايعان باسشىلاردىڭ جالپى سانى 1،4 مىڭنان ءسال اسادى، 2019 جىلمەن سالىستىرعاندا ولاردىڭ سانى 2،5 ەسە ازايدى.