شەتەلدىك ازاماتتار ءۇشىن تۇلعانى بانك كارتاسى ارقىلى راستاۋ قىزمەتى ىسكە قوسىلادى.
بۇل تۋرالى قازاقستاننىڭ مەملەكەتتىك كىرىستەر كوميتەتىنىڭ باسپا ءسوز قىزمەتى ءمالىم ەتتى. ەلەكتروندى كەزەك جۇيەسىن «CarGoRuqsat» ونلاين برونداۋ سەرۆيسىن ق ر قم «اقپاراتتىق-ەسەپتەۋ ورتالىعى» اق ماماندارى جاساپ شىعارعان جانە قىزمەت كورسەتەدى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
جوبا اۆتورلارىنىڭ ايتۋىنشا، سەرۆيس ۇدايى جەتىلدىرىلىپ كەلەدى. جاقىندا ول «Face ID»، ياعني ادامنىڭ كەلبەتىن سكانەرلەۋ ارقىلى تەكسەرۋمەن تولىعىپ، شەتەلدىك ازاماتتار ءۇشىن تۇلعانى بانك كارتاسى ارقىلى راستاۋ قىزمەتى ىسكە قوسىلماق.
«مەملەكەتتىك دەرەكتەر بازاسى ارقىلى تەكسەرىستەن قازاقستاندىق تاسىمالداۋشىلار وتەتىندىكتەن، بىزدە شەتەلدىك تاسىمالداۋشىلار بويىنشا باسقا بازالارمەن ينتەگراسيا جاسالماعان. تيىسىنشە، ايلا-شارعى جاساۋ دەرەكتەرى ورىن العان. ماسەلەن، بىرنەشە رەسەيلىك جانە پولياك كومپانياسى مەملەكەتتىك نومىرلەردى وزگەرتۋ، ياعني ءبىرىنشى جاعدايدا «سىزىقشا» قويىپ، ەكىنشى رەت «بوس ورىن» قالدىرۋ سەكىلدى ءبىر نومەردى تۇرلەندىرۋ ارقىلى كەزەك العان. وسىلايشا ولار جاپپاي ورىن الىپ، وسى ارقىلى ءوز كليەنتتەرىنىڭ كولىگىن جىلجىتۋ مۇمكىندىگىنە يە بولعان»، - دەدى ق ر قم «اقپاراتتىق-ەسەپتەۋ ورتالىعى» اق باس مامانى ازامات قۇرمانوۆ.
تالداۋلار كورسەتكەندەي، سەرۆيس ىسكە قوسىلعالى ەكى اي ىشىندە «دوستىق» بەكەتى ارقىلى شەكارادان 1759 كولىك قۇرالى، ونىڭ ىشىندە 1108ء-ى نەمەسە 63 پايىزى وسى پايدالانۋشىلاردىڭ كولىكتەرى.
«پايدالانۋشى كەلىسىمشارتىن بۇزعانى ءۇشىن بۇل پايدالانۋشىلاردىڭ اككاۋنتتى بۇعاتتالعان. ەگەر بروندا كورسەتىلگەن ءنومىرلى فۋرالار شەكاراعا كەلسە، ولار وتە الادى، ءبىراق اتالعان پايدالانۋشى كەزەكتى وزگەرتۋ نەمەسە قانداي دا ءبىر بروندى جىلجىتۋ قۇقىعىنان ايىرىلادى. پايدالانۋشى كەلىسىمشارتىن بۇزۋ دەرەگى بويىنشا ماتەريالدار بۇل ارەكەتتەرىنە ءتيىستى باعا بەرۋ ماقساتىندا قۇقىققورعاۋ ورگاندارىنا بەرىلەتىن بولادى. جاسالعان پايدالانۋشى كەلىسىمشارتتارىنا ساي بۇل كەلىسىمشارتتى بۇزعان پايدالانۋشىلار اككاۋنتارىن بۇعاتتان شىعارۋ 90 كۇنتىزبەلىك كۇن وتكەننەن كەيىن نەمەسە وعان دەيىن - سوتتىڭ شەشىمى بويىنشا جۇزەگە اسىرىلادى»، - دەدى ازامات قۇرمانوۆ.
ەسكە سالساق، 2022 جىلعى 23 قاراشادان باستاپ قازاقستان-قىتاي شەكاراسىنىڭ بىرنەشە بەكەتىندە «CarGoRuqsat» ەلەكتروندى كەزەك سەرۆيسى ىسكە قوسىلعان. سەرۆيستى مەملەكەتتىڭ ءجۇز پايىزدىق قاتىسۋىمەن، ق ر قارجى مينيسترلىگىنىڭ «اقپاراتتىق-ەسەپتەۋ ورتالىعى» اق جاساپ شىعارعان. «CarGoRuqsat» ەلەكتروندى سەرۆيستى ەنگىزۋ باستاماسى ق ر قم مەملەكەتتىك كىرىستەر كوميتەتى مەن ق ر ۇلتتىق قاۋىپسىزدىك كوميتەتىنىڭ شەكارا قىزمەتىنە تيەسىلى. سەرۆيس Qoldau.kz سيفرلىق پلاتفورماسىندا ىسكە قوسىلعان جانە پايدالانۋشىلار ءۇشىن تەگىن.
«CarGoRuqsat» ەلەكتروندى كەزەك سەرۆيسىنىڭ مىندەتى تاسىمالداۋشىلارعا الدىن الا كەزەك الۋ مۇمكىندىگىن ۇسىنۋ جانە بۇل كەزەكتى جاريا ەتۋ. بىرىنشىدەن، بۇل جۇك كولىكتەرىنىڭ شەكارادان ءوتۋ پروسەسىن جەڭىلدەتتى. بۇل برونداۋ كەزەڭىندە-اق تاسىمالداۋشىلاردىڭ فورماتتىق-لوگيكالىق باقىلاۋدان ءوتۋى ەسەبىنەن جۇزەگە اسىرىلادى. جۇيە ءوتىنىش بەرۋشىنىڭ سالىقتار بويىنشا، اقىلى جولداردان جۇرگەنى بويىنشا قارىزداردىڭ بار-جوعىنا، تارتقىش پەن تىركەمەنىڭ تىركەۋدەن وتكەنىن جانە ت.ب. تەكسەرەدى، سەرۆيستىڭ ەكىنشى مىندەتى – شەكاراداعى جەمقورلىق قاۋىپتەرىن بارىنشا ازايتۋ.