كەيىنگى 3 جىلدا قازاقستاندا ەكوتۋريستەر سانى 2 ەسەدەن استام ءوستى. ەگەر 2020 جىلى ولار 985 مىڭ بولسا، 2022 جىلدىڭ سوڭىندا 2 ملن-عا جەتتى، دەپ حابارلايدى Almaty-akshamy.kz ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
«بۇل قازاقستانداعى ەكولوگيالىق ءتۋريزمنىڭ دامۋ ديناميكاسى جانە ەلدەگى ەكوتۋريزم مادەنيەتىنىڭ قالىپتاسقانىنىڭ كورسەتكىشى. سونداي-اق رەسپۋبليكانىڭ ۇلتتىق ساياباقتارىندا جاڭا تۋريستىك نىساندار: ۆيزيت-ورتالىقتار، كەمپينگتەر مەن گلامپينگتەر سالىنىپ جاتىر. وندا قوناقتارعا جەرگىلىكتى ەكوجۇيە جانە جابايى جانۋارلار، تۋريستىك مارشرۋتتار، تاسىمالداۋ پۋنكتتەرى جانە ت.ب. تۋرالى اقپارات بەرىلەدى. مىسالى، «ايۋساي» ۆيزيت-ورتالىعىندا تۋريستەردىڭ قاۋىپسىزدىك جۋرنالىنا ءار ءتۇرلى سوقپاق جولدارمەن شىعاتىن ساياحاتشىلاردى تىركەيدى. ەگەر دەمالۋشىلار ساعات 22:00-گە دەيىن ورالماسا، ۆيزيت-ورتالىق قىزمەتكەرلەرى ىزدەۋدى باستايدى»،- دەدى مادەنيەت جانە سپورت ۆيسە-مينيسترى ەرجان ەركىنبايەۆ.
ەستەرىڭىزگە سالا كەتەيىك، كەيىنگى 2 جىلدا قازاقستاننىڭ ۇلتتىق پاركتەرىندە 14 ۆيزيت-ورتالىق اشىلدى، ونىڭ 7ء-ۋى جەكە ينۆەستورلاردىڭ قاراجاتىن تارتا وتىرىپ سالىندى. سونىمەن قاتار، ەلدەگى گلامپينگتەر سانى بيىل 38-گە جەتتى.