كازينوقۇمارلىق «لۋدومانيا» اۋرۋىنا جاتادى ەكەن
بالكىم، مىنا وقيعا بولماعاندا، بۇل ماقالانى جازباس پا ەدىم؟ ءوز باسىم ومىردە قۇمار ويىندارعا اۋەس بولماعانىم ءۇشىن تاعدىرىما تاۋبە دەيمىن. جاسىراتىن نەسى بار، جاستىق شاقتا ءبىراز كارتانىڭ سوڭىنا تۇسكەن جايىمىز بار. بىرنەشە كۇن دەمالماي ويناعان كەزىمىز دە از بولعان جوق. ءبىر تۇندە دۇنيە اقشانى ۇتىپ، ەرتەڭىندە سول اقشانى قايتا ۇتتىردىق تا. الايدا، ۇتىلسام، ەشكىمنەن قارىز سۇراپ نەمەسە دۇنيە-مۇلكىمدى كەپىلدىككە قويىپ ويناپ كورگەن ەمەسپىن. ويناسام، قولىمداعى بارعا قاناعات قىلىپ وينادىم. كەيىننەن بايقاسام، بۇل ويىن مەنى ءبىر تۇڭعيىققا تارتىپ بارا جاتقان سياقتى كورىندى. سوندىقتان دا ونىڭ ابىروي اپەرمەيتىنىن تەز تۇسىنگەن سوڭ، دەر كەزىندە قويا سالدىم. سويتسەم، سانالى تۇردە توقتاي ءبىلۋ دە ۇلكەن ەرىك پەن جىگەرلىلىكتىڭ بەلگىسى ەكەن. كەيىننەن وزىممەن قاتار كارتا ويناعان جىگىتتەردىڭ ءبىرازىنىڭ ومىردە جولدارى بولمادى.
ال كازينوعا ومىرىمدە جولداس جىگىتتەرمەن 3 مارتە عانا باردىم. وندا دا ۋاقىت وتكىزۋ ءۇشىن. ەڭ سوڭعى بارعانىمدا، جانىمداعى جولداسىم ءبىر ساعاتتىڭ ىشىندە ون مىڭ دوللاردان ۇتىلدى. سودان كەيىن ىزاعا بۋلىققان ول ۇيالى تەلەفونىمەن بىرەۋلەرگە «اقشا اكەل» دەپ حابارلاسا باستادى. سول كەزدە قولىنداعى تەلەفونىن جۇلىپ الىپ، كازينودان زورعا الىپ شىقتىم. ول بولسا، مەندەگى تەلەفونعا جارماسا بەردى. اقىرى قول كوتەرۋىمە تۋرا كەلدى. سول كۇننەن باستاپ ءبىزدىڭ ارامىز سۋىدى. سويتسەم، الگى تانىسىم كازينونىڭ قۇمارپازى ەكەن.
جاقىندا كوشەدەن سول جىگىتتى كەزدەستىرىپ قالدىم. بازاردىڭ ماڭىندا جاياۋ كەتىپ بارادى ەكەن. ۇستىندەگى كيىمى دە جۇپىنى كورىندى. مەن بىردەن ءتۇسىندىم. سەبەبى، ءبىراز بۇرىن جاقىن تانىستارىمنان كازينوعا ءۇيى مەن كولىگىن سالىپ، بار جيعانىنان ايىرىلعانىن جانە وتباسىمەن اجىراسىپ كەتكەنىن ەستىگەن ەدىم. كوپتەن كورمەگەندىكتەن بە، اڭگىمەلەسىپ ءبىراز تۇرىپ قالدىق. «ءبورى ارىعىن بىلدىرمەس، سىرتقا قارنىن تومپايتار» دەگەندەي، ماعان ەش سىر بىلدىرگىسى كەلمەدى. مەن دە قازبالاپ ەشتەڭە سۇرامادىم. سودان كەيىن ءتۇس الەتى بولعان سوڭ، بىرگە تاماقتانىپ الۋعا شاقىردىم. ول قۋانىپ كەتتى. ستول ۇستىندە نەبىر اڭگىمەلەردى ايتىپ، مەنىڭ كوڭىلىمدى وزىنە اۋدارعىسى كەلدى. ايتقانىنىڭ جارتىسى وتىرىك ەكەنىن سەزىپ وتىرسام دا، ەشتەڭە دەمەدىم. ءسوزىنىڭ استارىنان اقشا سۇراعالى وتىرعانىن اڭعارۋ قيىن ەمەس ەدى. ءتىپتى، اڭگىمە اراسىندا: «سەنى ۇلكەن كىسىلەرمەن تانىستىرايىن. قىزمەتىڭ وسۋىنە كومەكتەسەدى. تەك ولارعا بىردەڭە بەرۋ كەرەك...» دەپ كەتىپ بارادى جوسىلتىپ. سول كەزدە:«كوڭىلىڭە راحمەت، قاجەت ەمەس» دەگەنىمدە، كوڭىلى بۇزىلىپ كەتتى.
ۇيگە كەلگەن بەتتە «ويىنقۇمارلىق ادەت پە الدە اۋرۋ ما؟» دەگەن ويدىڭ جەتەگىمەن عالماتورداعى ماتەريالداردى اقتاردىم. سويتسەم، كازينوقۇمارلىق «لۋدومانيا» اۋرۋىنا جاتادى ەكەن. جانە دە بۇل اۋرۋعا ۇشىراعانداردىڭ ينتەللەكتۋالدىق جانە كوممۋنيكاتيۆتىك قابىلەتتەرى وتە جوعارى بولاتىن كورىنەدى. ولار ادامداردان اقشا سۇراعان كەزدە قارىز بەرۋشى ادامنىڭ ءوزى ولاردىڭ سوزىنە قالاي سەنىپ قالعانىن بايقاماي قالادى. سونداي-اق «لۋدومانيا» دەرتىنە شالدىققانداردىڭ اراققا نەمەسە ەسىرتكىگە تاۋەلدى ادامداردان ەش ايىرماشىلىعى جوق ەكەنى عىلىمي تۇردە دالەلدەنىپتى. سەبەبى، اراققا سالىنعان القاشتار اۋزىنا اراق تيسە بولدى، ءبىر ستاقانمەن توقتاي الامايتىنى بەلگىلى. شولمەكتىڭ ءتۇبى تۇسكەنشە ىشەدى. ناشاقور دا سول، ءبىر دوزامەن توقتاي المايدى.
«لۋدومانيامەن» اۋىراتىندار دا سولار سياقتى. مىسالى، مىڭ دوللار ۇتىلسا، ونىمەن توقتاي المايدى. قايتسە دە ۇتامىن دەگەن ۇمىتپەن ويىندى جالعاستىرا بەرگىسى كەلەدى. اقىرىندا بار جيعان-تەرگەنىنەن ايىرىلادى. سونىمەن قاتار كازينودا سەنىڭ كولىگىڭ مەن جىلجىمايتىن مۇلىگىڭدى جانە باسقا دا ماتەريالدىق دۇنيەلەرىڭدى لەزدە باسقا بىرەۋدىڭ اتىنا اۋدارا سالاتىن قىزمەت ءتۇرى دە جاقسى دامىعان. وندايلار بۇنداي قۇمارپازداردى ءمۇلت جىبەرمەيدى.
مىنە، «لۋدومانيامەن» اۋىرعان ادامدار ءتۇپتىڭ تۇبىندە بار جيعان-تەرگەنىنەن، بالا-شاعادان، اعايىن-تۋعاننان، جورا-جولداستان ايىرىلادى. ياعني، بارلىق سەنىمنەن ايىرىلعان سوڭ، قوعامدا ادام رەتىندەگى ءوزىنىڭ ءرولىن دە جوعالتادى. ونىڭ اقىرى كوبىنە ۇرلىق جاساۋعا، كىسى ولتىرۋگە، الاياقتىققا جانە سۋيسيدكە اكەلىپ سوقتىرىپ جاتادى.
سوندىقتان دا پسيحولوگتاردىڭ ايتۋى بويىنشا، قازىرگى IT تەحنولوگياسى دامىعان زاماندا بالالاردىڭ سمارتفونمەن قانداي ويىنداردى ويناپ جۇرگەنىن ءجىتى نازاردا ۇستاعان ءجون. بۇل دەگەنىڭ قۇمارپاز ويىنعا اپاراتىن، ياعني اتالمىش دەرتكە شالدىقتىراتىن نەگىزگى جول ەكەنى ءسوزسىز.