پوليسيا دەپارتامەنتىندە اقپاراتتىق تەحنولوگيالاردى مەڭگەرگەن ارنايى جۇمىس توبى قۇرىلدى.
جەدەل تەرگەۋ توبىنىڭ نەگىزگى مىندەتى - اتالعان ساناتتاعى قىلمىستىق ىستەردى اشۋ، دەپ حابارلايدى Almaty-akshamy.kz
قىلمىستىق قۇقىقبۇزۋشىلىقتاردى تالداۋ جۇمىستارى الماتىدا ينتەرنەت-الاياقتىقتىڭ سانى ەكى ەسەگە ارتقانىن كورسەتتى.
«IT تەحنولوگيالار سالاسىنداعى قىلمىسقا قاتىستى ماسەلەلەر وزەكتى بولىپ قالۋدا. بۇگىندە قىلمىسكەرلەر وزدەرىنىڭ پايداكۇنەمدىك ماقساتتارىنا جەتۋ ءۇشىن الەۋمەتتىك جەلىلەردى، سونداي-اق ينتەرنەت كەڭىستىگىن بەلسەندى تۇردە پايدالانۋدا»، - دەيدى الماتىنىڭ باس پوليسەيى قانات تايمەردەنوۆ.
وسىنداي قىلمىس تۇرلەرىن اشۋمەن اينالىساتىن پوليسيا دەپارتامەنتىندە اقپاراتتىق تەحنولوگيالاردى مەڭگەرگەن ارنايى جۇمىس توبى قۇرىلدى. جەدەل-تەرگەۋ توبىنىڭ نەگىزگى مىندەتى - اتالعان ساناتتاعى قىلمىستىق ىستەردى اشۋ.
«ءبىز الاياقتىق جارنامالارى بار ينتەرنەت-سايتتاردى انىقتاۋ بويىنشا جۇمىسىمىزدى جەتىلدىردىك. ولار «كيبەرنادزور» جۇيەسى ارقىلى بۇعاتتالادى. بارلىعى 1،5 مىڭ وسىعان ۇقساس رەسۋرس بۇعاتتالدى. سونىمەن قاتار، ينتەرنەت-الاياقتىقتىڭ كەڭ تاراعان تۇرلەرى، ولاردىڭ الدىن الۋ جولدارى تۋرالى اقپاراتتار بار الەۋمەتتىك روليكتەر كەڭىنەن تاراتىلۋدا»، – دەدى قانات تايمەردەنوۆ.
سونداي-اق، الماتى قالاسىنىڭ باس پوليسەيى قابىلدانعان شارالاردىڭ ناتيجەسىندە ءبىرىنشى توقساندا ينتەرنەت-الاياقتىقتىڭ 45%-عا ازايىپ، ونىڭ اشىلۋ كورسەتكىشى 17%-عا جاقسارعانىن اتاپ ءوتتى.