مادەنيەت جانە سپورت ءمينيسترى اسحات ورالوۆ دۋبلياج ماسەلەسى بويىنشا اپپارات كەڭەسىن وتكىزدى.
كۇن تارتىبىندەگى باستى تاقىرىپ – كورەرمەندەردىڭ سۇرانىسىنا يە كاسسالىق فيلمدەردى مەملەكەتتىك تىلدە دۋبلياجداۋ، دەپ حابارلايدى Almaty-akshamy.kz
"جىل باسىنان قازاقستاندا بىرنەشە ءىرى كينوپرەمەرا ءوتتى. ولاردىڭ كەيبىرى قازاق تىلىندە دۋبلياجدىڭ بولماۋىنا بايلانىستى كورەرمەندەرىمىزدىڭ نازارىنان تىس قالدى. مەن حالىقتىڭ پىكىرىن باقىلاپ وتىرمىن. ءبىز بۇل ماسەلەنى ەشقاشان ەستەن شىعارمايمىز. كاسسالىق فيلمدەر اۋديتورياعا مەملەكەتتىك تىلدە قولجەتىمدى بولۋى كەرەك"، - دەدى ورالوۆ اپپارات كەڭەسىندە.
ونىڭ ايتۋىنشا، بيىل مادەنيەت سالاسىن دامىتۋدىڭ 7 جىلدىق تۇجىرىمداماسى ازىرلەنىپ، ۇكىمەت قاۋلىسىمەن بەكىتىلدى. مينيسترلىك ەندى جىل سايىن كەم دەگەندە 15 كينوپرەمەراعا قازاق تىلىندە دۋبلياج جاسالۋى كەرەك دەگەن مىندەت قويىپ وتىر.
"تاعى ءبىر وزەكتى ماسەلە – قازاقشا دۋبلياجبەن شىعاتىن كارتينالار سەانسى ءاردايىم كورەرمەندەرگە ىڭعايلى ۋاقىتتا قويىلا بەرمەيدى. بۇل تۋرالى دا ماعان الەۋمەتتىك جەلىدە ءجيى جازادى. ءفيلمدى مەملەكەتتىك تىلدە كورگىسى كەلەتىندەر كوبىنەسە تۇندە كينوعا بارۋعا ءماجبۇر. بۇل، ارينە، دۇرىس ەمەس. ءبىز كينوتەاترلاردىڭ جەكەمەنشىك كاسىپ نىسانى ەكەنىن تۇسىنەمىز. دەگەنمەن دە مەملەكەتتىك تۇرعىدان ءبىز دۇنيەجۇزى كورەتىن كينوپرەمەرالاردىڭ قازاق تىلىندە جانە ىڭعايلى ۋاقىتتا كورسەتىلۋىن قامتاماسىز ەتۋگە مىندەتتىمىز"، - دەدى مينيستر.
وسىعان بايلانىستى ورالوۆ جەكە كاسىپكەرلەرمەن، كينوتەاتر يەلەرىمەن وسى باعىتتاعى جۇمىستى جانداندىرۋدى تاپسىردى.
ايتا كەتەرى، مادەنيەت جانە سپورت ءمينيسترى ناۋرىز ايىندا مەملەكەتتىك تىلگە دۋبلياج جاساۋ ءۇشىن فيلمدەردى ىرىكتەۋ ەرەجەسىن بەكىتتى. مينيسترلىك الداعى بىرنەشە جىلدا جالپى پروكاتتاعى قازاق تىلىندەگى فيلمدەردىڭ ۇلەسىن 30%-عا دەيىن جەتكىزۋگە نيەتتى. بۇل كورسەتكىش كاسسالىق شەتەلدىك فيلمدەرگە مەملەكەتتىك تىلدە دۋبلياج جاساۋ ارقىلى دا ارتۋى ءتيىس.