گيدرانتتاردان اققان 500 ليتر سۋ تەڭىزگە جايىلىپ كەتكەن
اقتاۋدىڭ ءورت سوندىرۋشىلەرى تەڭىزگە لاس سۋ توككەنى ءۇشىن جازاعا تارتىلدى. كىنالى تۇلعالار ەندى ايىپپۇل تولەيدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
تاياۋدا كاسپييگە قىزعىلت تۇستەس سۇيىقتىق توگىلگەنى كورسەتىلگەن بەينەجازبا عالامتوردا جاريالانعان بولاتىن. 1-شاعىن اۋدانداعى جاعاجاي شۇعىل تەكسەرىلىپ، توت ارالاس ىلعالدىڭ سول ماڭداعى №13 ءورت ءسوندىرۋ بولىمىنەن شىققانى انىقتالدى.
ەكولوگتاردىڭ ايتۋىنشا، تەسىك سيستەرنادا ساقتالعان جانە گيدرانتتاردان اققان 500 ليتر سۋ تەڭىزگە جايىلىپ كەتكەن.
«جەدەل شولۋ جۇمىستارى جۇرگىزىلىپ، تەڭىز سۋىنان سىنامالار الىندى. ءورت ءسوندىرۋ جاساعىنىڭ باسشىسىنان تۇسىنىكتەمە الىندى. كوپ ۋاقىت ساقتالعان سۋ تاتتانىپ، سول كۇيى تەڭىزگە اعىپ كەتكەن. قىزمەتتىك مىندەتتى ادامعا ايىپپۇل رەتىندە شارا قولدانىلاتىن بولادى»،-دەدى ەكولوگيا دەپارتامەنتىنىڭ ءبولىم باسشىسى گۇلىم ۇلىقپانوۆا.