بولىنگەن قارجى قالاي جۇمسالادى؟
بۇل تۋرالى وسك حاتشىسى سابينا مۇستافينا ورتالىق رەفەرەندۋم كوميسسياسى اياسىندا وتكەن بريفينگتە ايتتى.
«رەفەرەندۋمعا ۇكىمەتتىڭ رەزەرۆتىك قاراجاتىنان 16 ملرد 460 ملن تەڭگە ءبولىندى. ونىڭ 21 پايىزى ۋچاسكەلىك كوميسسيالاردىڭ ماتەريالدىق-تەحنيكالىق بازاسىن قامتاماسىز ەتۋگە، ورتالىق رەفەرەندۋم كوميسسياسىنىڭ، رەفەرەندۋمنىڭ ۋچاسكەلiك جانە اۋماقتىق كوميسسيالارىنىڭ جۇمىس جاعدايىن قامتاماسىز ەتۋ، باسپا ونىمدەرىن شىعارۋ، اقپاراتتىق قامتاماسىز ەتۋ بويىنشا جۇمىس، سونداي-اق رەسپۋبليكا بويىنشا اقپاراتتىق بيلبوردتاردى دايىنداۋ جانە ورنالاستىرۋعا جۇمسالادى»، – دەدى مۇستافينا.
سمەتادا قاراجاتتىڭ 79 پايىزى ۋچاسكەلىك جانە اۋماقتىق كوميسسيالاردىڭ 71 مىڭعا جۋىق مۇشەسىن ەڭبەكاقىمەن قامتاماسىز ەتۋگە جۇمسالماق. «تولەم ناقتى جۇمىس ىستەگەن ۋاقىتىنا قاراي تولەنەدى. كوميسسيا مۇشەلەرىنىڭ بارلىعى بىردەي جۇمىس ىستەمەيدى. كوميسسيا مۇشەلەرىنىڭ كوپشىلىگى ءىس جۇزىندە نەگىزگى كاسىبي قىزمەتىنەن اۋىتقىمايدى جانە كوميسسيالاردا كەستە بويىنشا جۇمىس ىستەيدى»، – دەدى ول.
داۋىس قالاي بەرىلەدى؟
بۇل تۋرالى وسك باسشىسىنىڭ ورىنباسارى كونستانتين پەتروۆ ءتۇسىندىردى.
«بيۋللەتەندەر جاسىرىن داۋىس بەرۋ كابيناسىندا تولتىرىلۋى ءتيىس. ونى اركىم ءوزى تولتىرادى. تولتىرۋ كەزىندە سايلاۋشىدان باسقا بىرەۋدىڭ بولۋىنا تىيىم سالىنادى. ەگەر جەكە ازاماتتار دەنساۋلىعىنا بايلانىستى نەمەسە باسقا سەبەپتەرمەن ونى ءوز بەتىنشە تولتىرا الماسا، ولار رەفەرەندۋمدى ۇيىمداستىرۋشىلار مەن باقىلاۋشىلاردىڭ قىزمەتىن ەمەس، باسقا ازاماتتىڭ قىزمەتىن پايدالانۋعا قۇقىلى»، – دەدى ك.پەتروۆ.
ونىڭ ايتۋىنشا، ازامات ءوزى داۋىس بەرەتىن جاۋاپتىڭ وڭ جاعىنداعى بوس جاشىككە كەز كەلگەن بەلگىنى قويا الادى.
«ءبىر سۇراق، ەكى جاۋاپ. ونى تاڭداپ، ءبىر بەلگى قويۋ كەرەك، – بەلگىلەۋگە بولادى، + قويۋعا بولادى، دوڭگەلەتۋگە بولادى، «گالوچكا» قويۋعا بولادى. ءبىراق تاڭداۋ انىق بولۋى كەرەك. قارىنداشپەن بەلگى قويۋعا، سونداي-اق ولارعا قانداي دا ءبىر تۇزەتۋلەر ەنگىزۋگە جول بەرىلمەيدى. تولتىرىلعان بيۋللەتەن سايلاۋ جاشىگىنە تاستالادى»، – دەدى.
قاتىسۋدى قالاي تەكسەرۋگە بولادى؟
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسەت تۇرىسوۆ تارقاتتى.
ول رەفەرەندۋم ۋچاسكەسىنىڭ شەكارالارىندا تۇرعىلىقتى جەرى بويىنشا تۇراقتى تىركەلگەن ازامات ءوزىن رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمىنەن تاپپاعان جاعدايدا، ءوزىنىڭ دەربەس دەرەكتەرىن پايدالانۋ تۋرالى كەلىسىمىن كورسەتە وتىرىپ، تىزىمگە ەنگىزۋ تۋرالى جازباشا وتىنىشپەن ۋچاسكەلىك كوميسسياعا جۇگىنۋگە قۇقىلى ەكەنىن ايتتى.
ونلاين-سەرۆيس پاراعىندا ءوتىنىش بەرۋشىنىڭ تۇرعىلىقتى جەرى بويىنشا رەفەرەندۋمنىڭ ءتيىستى ۋچاسكەسىنىڭ شەكاراسىنداعى اۋماقتا تۇراقتى تىركەلگەنى تۋرالى مالىمەتتەر راستالعان كەزدە ۋچاسكەلىك كوميسسيا ونى رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمىنە ەنگىزۋ تۋرالى شەشىم قابىلدايدى.