كاسپيي تەڭىزىنىڭ قازاقستاندىق سەكتورىنداعى «قاشاعان» كەن ورنىنان مۇناي ءوندىرۋ قايتا جالعاسادى، دەپ حابارلايدى Almaty-akshamy.kz Inform.kz-كە سىلتەمە جاساپ.
NCOC كومپانياسى باسپا ءسوز قىزمەتىنىڭ مالىمەتىنشە، «قاشاعان» كەن ورنىنداعى تەڭىز جانە قۇرلىق نىساندارىندا جوسپارلى الدىن الۋ ماقساتىنداعى جوندەۋ جۇمىستارى ويداعىداي اياقتالعان. وندىرىستىك وپەراسيالاردى تولىقتاي توقتاتۋ كەزىندە NCOC قاجەتتى تەحنيكالىق كۇتىم جاساۋ مەن تەكسەرۋ جۇمىستارىن جۇرگىزدى. وندىرىستىك وپەراسيالاردىڭ قاۋىپسىزدىگى مەن سەنىمدىلىگىن قامتاماسىز ەتۋ باعىتىنداعى ءبىرقاتار جوبانى ىسكە اسىردى.
«NCOC ءۇشىن جوسپارلى الدىن الۋ ماقساتىنداعى جوندەۋ جۇمىستارى – نىساننىڭ بۇتىندىگىن قامتاماسىز ەتۋ، سەنىمدىلىگىن مەن ءوندىرىس كولەمىن ارتتىرۋ باعىتىنداعى ايتۋلى كەزەڭ. كەڭ اۋقىمدى جۇمىستاردى ءقاۋىپسىز ءارى ۋاقتىلى ورىنداۋعا 10 مىڭنان استام ادام جۇمىلدىرىلدى. ونى قازاقستاندىق ماماندار اتقاردى. جوندەۋ جۇمىستارىن اتقارۋعا اتسالىسقان تاراپتارعا – مەردىگەرلەرىمىز، اكسيونەرلەرىمىز بەن مەملەكەتتىك ورگاندارعا وسى ماڭىزدى جوبانى ۋاقتىلى جانە ويداعىداي اياقتاۋ ماقساتىندا كورسەتكەن قولداۋلارى مەن قوسقان ۇلەستەرى ءۇشىن العىس بىلدىرگىم كەلەدى» -دەيدى NCOC كومپانياسىنىڭ باسقارۋشى ديرەكتورى وليۆە لازار.
ونىڭ ايتۋىنشا، جوندەۋ جۇمىستارى اياقتالعاننان كەيىن NCOC ۇڭعىمالاردى قايتا اشىپ، وندىرىستىك جۇيەلەردى قالىپتى جۇمىس رەجيمىنە اۋىستىردى. تەڭىز جانە قۇرلىق نىساندارىن بىرتىندەپ قايتا ىسكە قوسا باستادى. NCOC قاۋىپسىزدىك پەن ءوندىرىستىڭ تۇراقتىلىعىنا باستى نازار اۋدارىپ، ءوندىرىس كولەمىن ارتتىرۋدى بۇدان ءارى جالعاستىرا بەرمەك.
بۇدان بۇرىن 1 ماۋسىمنان باستاپ «قاشاعان» كەن ورنىنداعى وندىرىستىك نىساندارى جۇمىسى 45 كۇنگە توقتايتىنىن جازعان ەدىك.
وسى كەزەڭدە ونىمدىلىكتى جانە ءوندىرۋ جۇيەسىنىڭ سەنىمدىلىگىن وڭتايلاندىرۋ مەن ودان ءارى ارتتىرۋعا ارنالعان ءبىرقاتار جۇمىستار مەن جوبالاردىڭ ورىندالۋىن قامتاماسىز ەتۋ كوزدەلگەن. كولەمى 2 ملن ادام-ساعاتتان اساتىن اۋقىمدى جۇمىستاردى 45 كۇن ىشىندە ورىنداۋ جوسپارلانعان.
«قاشاعان» – كاسپيي تەڭىزىنىڭ قازاقستاندىق سەكتورىندا مۇناي وندىرىلەتىن العاشقى ەڭ ءىرى كەن ورنى. 2000 جىلى اشىلعان. مۇندا وندىرىلەتىن مۇناي قورى – بولجام بويىنشا 9-13 ملرد باررەل. «قاشاعاندا» كوممەرسيالىق مۇناي ءوندىرۋ 2016 جىلعى كۇزدە باستالعان.