يتاليادا اۋدانى مەن ۇزىندىعى جاعىنان ەڭ ۇلكەن پو وزەنى تارتىلىپ جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
سۋ تاپشىلىعى ديقانداردىڭ ەگىنىن قۇرتۋدا. بىرنەشە اي بۇرىن عانا جاسىل جاعالاۋدى بويلاي اعىپ جاتقان وزەن ارنالارى قازىرگى كەزدە شولگە ۇقساعان.
يتاليانىڭ سولتۇستىگىندەگى قۇرعاقشىلىق سوڭعى 70 جىلداعى ەڭ اۋىرى دەپ سانالىپ وتىر. وعان كوكتەم مەن جازدا جاۋىن-شاشىننىڭ، ال قىستا قاردىڭ از جاۋعانى، جازدا اۋا تەمپەراتۋراسىنىڭ جوعارىلاۋى سەبەپ بولعان.
شىلدە ايىنىڭ باسىندا قۇرعاقشىلىققا بايلانىستى يتاليانىڭ سولتۇستىگىندەگى بەس ايماقتا توتەنشە جاعداي جاريالانعان. ونداعان مۋنيسيپاليتەتتە سۋدى نورمالاۋ رەجيمى ەنگىزىلگەن. پو القابىنداعى شارۋالار وزەننىڭ كەي جەرلەرى تارتىلىپ قالعانىن، تاعى ءبىر ۋچاسكەلەرىندە تەڭىزدىڭ تۇزدى سۋى اعىنعا ءوتىپ، ەگىنگە زيان تيگىزىپ جاتقانىن ايتىپ وتىر.
پو وزەنى يتاليانىڭ سولتۇستىگىندە وڭتۇستىك-باتىس الپىدەن ادريات تەڭىزىنە دەيىن 650 شاقىرىمعا سوزىلعان. ەلدىڭ اۋىل شارۋاشىلىعى سالاسىنىڭ ۇشتەن ءبىر بولىگى دەرلىك وسى وزەنمەن بايلانىستى.