ماڭعىستاۋ وبلىسىنا جۇمىس ساپارىمەن بارعان پرەمەر-مينيستر ءاليحان سمايىلوۆ وسىلاي دەدى.
ۇكىمەت باسشىسى ءوڭىردىڭ الەۋمەتتىك-ەكونوميكالىق دامۋ بارىسىمەن جانە ءبىرقاتار ونەركاسىپتىك، ينفراقۇرىلىمدىق جانە تۋريستىك نىسانداردىڭ جۇمىسىمەن تانىستى، دەپ حابارلايدى Almaty-akshamy.kz
پرەمەر-مينيستر جۇمىس ساپارى بارىسىندا كاسپيي تەڭىزىنىڭ شىعىس جاعالاۋىندا بىرنەشە حالىقارالىق كولىك دالىزدەرىنىڭ قيىلىسۋ نۇكتەسىندە ورنالاسقان اقتاۋ تەڭىز ساۋدا پورتىنا باردى.
پورتتا شىعىستان باتىسقا، سولتۇستىكتەن وڭتۇستىككە جانە كەرى قاراي يران، تۇركيا، رەسەي جانە ازەربايجان باعىتىندا جۇك تاسىمالدانادى. بۇل – كاسپييدەگى ەڭ ءىرى كولىك تورابى.
مەملەكەت باسشىسىنىڭ تاپسىرماسى بويىنشا اقتاۋ پورتىنىڭ بازاسىندا كەمىندە 19 گا الاڭدا كونتەينەرلىك حاب سالۋ جوسپاردا بار.
قۇرعاق جۇك ايلاقتارىنىڭ قۋاتىن ۇلعايتۋدى كوزدەيتىن جوباعا كوپتەگەن شەتەلدىك كومپانيالار قىزىعۋشىلىق تانىتىپ وتىر، بۇل تەڭىز پورتىنىڭ كونتەينەرلىك پارك پەن سەرۆيستىڭ ءىرى تورابىنا اينالۋىنا جول اشادى.
«ماڭعىستاۋ وبلىسىنىڭ حالىقارالىق ماڭىزى بار، اۋقىمدى كولىك-لوگيستيكالىق جانە ينفراقۇرىلىمدىق-سەرۆيستىك الەۋەتى زور. الايدا ەلىمىزدىڭ تەڭىز پورتتارىنىڭ مۇمكىندىكتەرى تولىق پايدالانىلمايدى، ال جۇكتەمە ورتا ەسەپپەن 21%ء-تى عانا قۇرايدى. بۇل جاعدايدى وزگەرتۋ قاجەت. يندۋستريا جانە ينفراقۇرىلىمدىق دامۋ مينيسترلىگى «قازاقستان تەمىر جولى» اق-مەن بىرلەسىپ، ترانسكاسپيي حالىقارالىق كولىك باعىتى بويىنشا ەكسپورتتىق جۇكتەردى باعىتتاۋ ارقىلى اقتاۋ جانە قۇرىق تەڭىز پورتتارىنىڭ جۇكتەمەسىن ۇلعايتۋ ماسەلەسىن پىسىقتاۋى قاجەت»، - دەدى ءاليحان سمايىلوۆ.