كاسپيي قۇبىر كونسورسيۋمىنداعى شەكتەۋ مۇناي ءوندىرۋ كولەمىنە اسەر ەتپەيدى

مۇناي تاسىمالدايتىن 2 قۇرىلعى جۇمىسىن ۋاقىتشا توقتاتتى.

ەنەرگەتيكا ءمينيسترى بولات اقشولاقوۆ ءماجىلىس الاڭىندا كاسپيي قۇبىر كونسورسيۋمىنداعى مۇناي تاسىمالداۋ كولەمىنىڭ تومەندەۋىنە قاتىستى پىكىر ءبىلدىردى، دەپ حابارلايدى Almaty-akshamy.kz Egemen.kz سىلتەمە جاساپ. 

مينيستر مۇناي تاسىمالىنىڭ ازايۋىنا ەكىنشى دۇنيەجۇزىلىك سوعىس كەزىندە جارىلماي قالعان مينالاردى زالالسىزداندىرۋ جۇمىستارى سەبەپ بولعانىن اتاپ ءوتتى. ەنەرگەتيكا مينيسترلىگىنىڭ باسشىسى اتالعان جۇمىستار 15-25 ماۋسىم ارالىعىندا جۇرگىزىلەتىنىن ايتتى.

«مەن وتكەن اپتادا ايتىپ وتكەنىمدەي، تەڭىز تۇبىندە ءتيىستى جۇمىستاردى اتقارار الدىندا تازارتۋ ءىس-شارالارى جۇرگىزىلەدى. ويتكەنى ول جەردە ەكىنشى دۇنيەجۇزىلىك سوعىستان قالعان ءبىرشاما ءوق-دارى ءالى دە بار»، - دەدى بولات اقشولاقوۆ.

ول سونداي-اق قاشاعاندا 1 ماۋسىمنان 15 شىلدەگە دەيىن جوندەۋ جۇمىستارى جۇرگىزىلەتىنىن، دەگەنمەن، ءقازىر مۇنايدى ايلاقتان تاسىمالدايتىن ءبىر قۇرىلعى جۇمىس ىستەپ تۇرعانىن اتاپ ءوتتى.

«ال قالعان ەكەۋى تەڭىز ءتۇبىن تازارتۋ جۇمىستارىنا بايلانىستى توقتاپ تۇر. كاسپيي قۇبىرى كونسورسيۋمىنا جەتكىزىلەتىن مۇنايعا ايلاقتان تاسىمالدايتىن ءبىر قۇرىلعىنىڭ قۋاتى جەتەدى»، - دەپ ءتۇسىندىردى بولات اقشولاقوۆ.

مينيستر جوندەۋ جۇمىستارى مۇناي ءوندىرۋ كولەمىنە اسەر ەتپەيدى دەپ سەندىردى.

ايتا كەتسەك، كاسپيي قۇبىر كونسورسيۋمىنىڭ مۇناي تاسىمالدايتىن 2 قۇرىلعىسى جۇمىسىن ۋاقىتشا توقتاتتى.