جاقىندا ءبىر قۇرىلعى ىسكە قوسىلدى.
كاسپيي قۇبىر كونسورسيۋمىندا تاۋلىك سايىن 260 مىڭ توننادان استام مۇنايدى تيەۋ ءجۇرىپ جاتىر. بۇل تۋرالى «قازمۇنايگاز» كومپانياسىنىڭ باسقارما ءتوراعاسى ماعزۇم مىرزاعالييەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تاۋلىك بويى تيەلىپ جاتقان كولەمگە قاتىستى ايتاتىن بولساق، ءقازىر ەكى ايلاقتاعى قۇرىلعى ارقىلى 260 مىڭ توننادان استام مۇناي تيەلىپ جاتىر»، - دەدى م. مىرزاعالييەۆ تىلشىلەر سۇراعىنا جاۋاپ بەرە وتىرىپ.
كومپانيا باسشىسى مۇناي تيەۋ ءۇش قۇرىلعى (VPU) ارقىلى ىسكە اسىرىلاتىنىن جانە ونىڭ ەكەۋى ۇنەمى جۇمىس ىستەپ تۇرۋى كەرەك ەكەنىن ايتتى. ال ءۇشىنشىسى رەزەرۆتە تۇرۋى ءتيىس.
«جاقىندا ءبىر قۇرىلعى ىسكە قوسىلدى. ءقازىر كاسپيي قۇبىر كونسورسيۋمىندا ءۇش قۇرىلعىنىڭ ەكەۋى ارقىلى مۇناي تيەۋ ءجۇرىپ جاتىر. ءۇشىنشى قۇرىلعىنى جوندەۋ بويىنشا جۇمىستار باستالدى»، - دەدى م. مىرزاعالييەۆ.
بۇدان بۇرىن حابارلانعانداي، 12 قاراشادا كاسپيي قۇبىر كونسورسيۋمىنىڭ تەڭىز تەرمينالىنداعى ءبىرىنشى قۇرىلعىسى جوندەلگەنى ايتىلدى.
جاقىندا ق ر پرەمەر-مينيسترى ءاليحان سمايىلوۆ كاسپيي قۇبىر كونسورسيۋمىندا جوندەۋ جۇمىستارى قاشان اياقتالاتىنىن حابارلاعان ەدى.
«قازان ايىندا كونسورسيۋمداعى ەكى قوندىرعىنى جوندەۋدى اياقتاۋ جوسپارلانعان بولاتىن. ءبىراق اۋا رايىنا بايلانىستى بۇل جۇمىستار توقتاتىلدى. مەنىڭ ويىمشا، الداعى ەكى-ۇش كۇندە تەڭىزدەگى №1 قوندىرعىنى جوندەۋ جۇمىستارى اياقتالادى. ودان كەيىن بىردەن ەكىنشى قوندىرعىنى جوندەۋ باستالادى. ونى جوندەۋ شامامەن ەكى-ۇش اپتادا اياقتالادى»، - دەدى ءا. سمايىلوۆ سەناتتىڭ وتىرىسىنان كەيىنگى باسپا ءسوز ءماسليحاتىندا.