2024 جىلدىڭ 12 مامىرىنان باستاپ قازاقستاندا العاش رەت ونەركاسىپتىك كاسىپورىنداردىڭ تەحنولوگيالىق جابدىق ساتىپ الۋعا جۇمسالعان شىعىندارىن وتەۋ تەتىگى ىسكە قوسىلدى. وڭدەۋ ونەركاسىبى سالاسىنداعى كاسىپورىندار جۇمساعان قاراجاتتارىنىڭ 40 پايىزىنا دەيىن قايتارىپ الۋعا مۇمكىندىك الدى، دەپ حابارلايدى aqshamnews.kz
«QazIndustry» قازاقستاندىق يندۋستريا جانە ەكسپورت ورتالىعى» اق اتالمىش قولداۋ تەتىگىنىڭ ءبىر جىلداعى ناتيجەسىن جاريالادى.
«شىعىنداردى وتەۋدىڭ جاڭا تەتىگى ىسكە قوسىلعان ساتتەن باستاپ ءبىر جىل ىشىندە ءبىزدىڭ ورتالىق 1،1 ميلليارد تەڭگەگە كاسىپورىنداردىڭ تەحنولوگيالىق جابدىق ساتىپ الۋعا جۇمساعان شىعىندارىنىڭ ءبىر بولىگىن وتەدى»، – دەپ حابارلادى «QazIndustry» اق بيزنەستى ىنتالاندىرۋ ديرەكسياسى.
كاسىپورىندار 3D-سكانەرلەر، 3D-پرينتەرلەر جانە كەڭ فورماتتى پرينتەرلەر سياقتى زاماناۋي سيفرلىق شەشىمدەرمەن قوسا، تەحنولوگيالىق جابدىقتى ساتىپ الۋعا جۇمساعان شىعىندارىنىڭ 40%-ىن (ءبىراق 60 ميلليون تەڭگەدەن اسپايتىن) وتەۋگە مۇمكىندىگى بار.
جاڭا قولداۋ شاراسىن پايدالانعان كاسىپورىندار قاتارىندا الماتى جەلدەتكىش زاۋىتى، «مايامي Solar»، «ANNC Construction»، «مەحليتكوم»، «Barys E&T»، «Temir SAK» جانە باسقا دا كومپانيالار بار.
مىسالى، فيبروسەمەنتتى قاسبەتتىك تاقتالار وندىرۋگە ماماندانعان ANNC Construction زاۋىتىنا QazIndustry بوياۋ جەلىسىن ساتىپ الۋ شىعىندارىنىڭ ءبىر بولىگىن وتەدى. 44 ميلليون تەڭگە كولەمىندەگى وتەماقى كاسىپورىنعا ءوندىرىستى ودان ءارى جاڭعىرتۋعا جانە ءونىمنىڭ وزىندىك قۇنىن ەداۋىر تومەندەتۋگە مۇمكىندىك بەردى.
«وتەماقى الۋ ءۇشىن كاسىپورىن ءوتىنىمدى تاپسىرماس بۇرىن كەمىندە ءبىر جىل جۇمىس ىستەپ، سالىقتار مەن مىندەتتى تولەمدەر بويىنشا قارىزى بولماۋى كەرەك. سونىمەن قاتار، سوڭعى ءۇش جىلداعى سالىق تولەمدەرىنىڭ ءوسۋىن كورسەتۋ قاجەت. بۇل شارت ءۇش جىلدان از ۋاقىت بۇرىن تىركەلگەن كومپانيالارعا قاتىستى ەمەس»، – دەپ اتاپ ءوتتى «QazIndustry» اق بيزنەستى ىنتالاندىرۋ ديرەكسياسىنىڭ باسشىسى ا.ساعييەۆ.
QazIndustry مالىمەتى بويىنشا، جاڭا مەملەكەتتىك قولداۋ شاراسى كاسىپورىندار اراسىندا جوعارى سۇرانىسقا يە بولا باستادى. قولداۋ شاراسى ىسكە قوسىلعان ساتتەن بەرى ورتالىققا كاسىپورىنداردان 340-تان استام ءوتىنىم تۇسكەن.
ەستەرىڭىزگە سالا كەتەيىك، مەملەكەت كاسىپورىندارعا ەڭبەك ونىمدىلىگىن ارتتىرۋ جانە ىشكى نارىقتا ءونىمدى ىلگەرىلەتۋگە باعىتتالعان شىعىنداردىڭ ءبىر بولىگىن وتەيدى. وتەماقى مولشەرى 40%-تان 50%-عا دەيىنگى مولشەردى قۇرايدى. بۇل قولداۋ شارالارى تەك بيزنەسكە عانا ەمەس، بۇكىل ەل ەكونوميكاسىنا دا پايدالى: كومپانيالاردىڭ پايداسىنىڭ ءوسۋى سالىق تۇسىمدەرىنىڭ ارتۋىنا ىقپال ەتەدى.
مەملەكەتتىك ىنتالاندىرۋ شارالارىنىڭ شارتتارىمەن كەلەسى سىلتەمە ارقىلى تانىسۋعا بولادى https://qazindustry.gov.kz/ru/business_support جانە ءار سەيسەنبى، بەيسەنبى كۇندەرى QazIndustry عيماراتىندا (استانا قالاسى، قابانباي باتىر داڭعىلى، 17، ە بلوگىندا) وتەتەتىن اشىق ەسىك كۇندەرىنە كەلۋ ارقىلى بىلۋگە بولادى.
انىقتاما تەلەفونى: +7 (7172) 79 33 99 (ىشكى 444).