كاسىبىن دومالاتىپ، كۇنى-تۇنى ەڭبەك ەتكەن كاسىپكەرلەر قاراجاتتان قىسىلىپ جاتقان جوق. ەرىنبەي كورشى ەلدەن ءتۇرلى تاۋار تاسىپ، ساۋدا كوركىن قىزدىرىپ جاتقاندارى قانشاما؟ ەندەشە بۇگىنگى كورشى جۇڭگو ەلىمەن اراداعى ۆيزاسىز رەجيمنىڭ تيىمدىلىگى بار ما؟ جەكە كاسىپكەر ەرزات مۇسيراتتىڭ پىكىرىن بىلگەن ەدىك.
- جۇڭگو مەن قازاقستان اراسىندا ۆيزاسىز رەجيمنىڭ ەنگىزىلۋىن ءوز باسىم جاقسىعا جوريمىن. ونىڭ سەبەبىن ايتار بولسام، ەڭ الدىمەن، ءبىز مىنانى ەسكەرۋىمىز كەرەك. الەمدەگى جاعدايعا بايلانىستى جۇڭگو تاۋارىنىڭ ەۋروپاعا تاسىمالداۋىنا ۇلكەن كەدەرگى بولىپ تۇر. بۇل كەدەرگىنى جۇڭگو بيلىگى تەك رەسەي فەدەراسياسىن اينالىپ ءوتىپ، قازاقستان تەرريتورياسى ارقىلى كاسپيي تەڭىزىنە شىعىپ، ارى قاراي باكۋمەن ۇلى قۇرلىققا جەتۋ جوسپارلارىن ورىنداماقشى. بۇل ءبىز ءۇشىن ترانزيتتىك الەۋەتتى پايدالانۋداعى ۇلكەن مۇمكىندىك. ال تاۋار تاسىمالىنىڭ جۇك كولىكتەرى ارقىلى ىسكە اساتىنىن ەسكەرسەك، شەكارادان جۇك كولىكتەرىنىڭ كەدەرگىسىز وتۋىنە جۇرگىزۋشىلەردىڭ دە ۆيزاسىز ءوتۋى قاتتى ىقپال ەتەدى.
(سۋرەت: اشىق دەرەككوز)
ال ەكىنشى سەبەپ، ەل ازاماتتارى كورشى ەلگە ۆيزاسىز وتەتىن بولسا كاسىپ باستاماقشى بولعان ازاماتتارىمىز ءۇشىن جۇڭگو اشىق كەڭەستىككە اينالارى حاق. قاجەت كەزدە الەمنىڭ ەڭ ءىرى ءوندىرۋشى كاسىپورىندارىنا بارا الادى. سونىمەن قاتار قازاقستانعا ينۆەستيسيا تارتۋعا ۇلكەن مۇمكىندىك.
ال حالىقتىڭ ۇرەيىنە كەلەر بولساق، وعان ەش نەگىز جوق دەپ ويلايمىن. ۆيزاسىز كەلگەن ازامات ەلدە ۇزاق تۇرۋعا، تۇرۋ ماقساتىن وزگەرتۋگە، تۇراقتى تىركەۋگە تۇرۋعا مۇلدە رۇقسات جوق. مۇنىڭ بارلىعى تەك ۆيزامەن كەلگەن جاعدايدا عانا بولادى. 30 كۇن مەرزىم اياقتالعاندا ەلدەن شىعۋعا مىندەتتى. ال ەكى ەل اراسىنداعى كەلىسىلگەن ۋاقىتتان اسىپ كەتسە، ايىپپۇل مەن ەلدەن قۋۋ سىندى اۋىر شارالار قاراستىرىلعان، - دەيدى كاسىپكەر.