شىمكەنت قالاسىندا ازيا - تىنىق مۇحيت ايماعى بويىنشا ءوتىپ جاتقان ىرىكتەۋ ءتۋرنيرىنىڭ جارتىلاي فينالىندا ياروسلاۆا شۆەدوۆانىڭ شاكىرتتەرى الەمدەگى ۇزدىك قۇرامالاردىڭ ءبىرى، جاسوسپىرىمدەر اراسىندا بيللي دجين كينگ كۋبوگىنىڭ بەس دۇركىن چەمپيونى اۋستراليانى 2:0 ەسەبىمەن تىزە بۇكتىردى.
بۇل تۋرالى قازاقستان تەننيس فەدەراسياسىنان ءمالىم ەتتى، دەپ حابارلايدى Almaty-akshamy.kz.
ءبىرىنشى ويىندا اريانا گوگۋلينا قارسىلاسىن تارتىستى ماچتا 7:5، 3:6، 7:5 ەسەبىمەن ۇتتى. ول ءبىرىنشى پارتيادا 2:5 ەسەبىمەن جەڭىلىپ جاتىپ، قاتارىنان بەس گەيمدى الدى.
پولينا سلەپسوۆا اۋستراليا كوشباسشىسى تاحليا كوككينيستى جەڭدى - 7:5، 6:4.
وسىلايشا، قازاقستان جاسوسپىرىمدەر قۇراماسى بيىل كۇزدە وتەتىن 16 ۇزدىك كوماندانىڭ قاتارىندا الەم چەمپيوناتىندا ونەر كورسەتەدى.
ەرتەڭ، 6 مامىر كۇنى فينالدا قازاقستاندىق قىزدار جاپونيا نەمەسە وڭتۇستىك كورەيانىڭ بىرەۋىمەن كەزدەسەدى.
ەسكە سالا كەتەيىك، بۇدان بۇرىن قازاقستان جاسوسپىرىمدەرىنىڭ ىرىكتەۋ ءتۋرنيرىنىڭ 1/2 فينالىنا شىققانىن جازعان بولاتىنبىز.
سونداي-اق الەكساندر بۋبليك فرانسياداعى ءتۋرنيردىڭ شيرەك فينالىنا شىقتى.