قىلمىستىق بايۋدىڭ مۇنداي ءادىسىن بۇرىن وسىعان ۇقساس قىلمىستار جاساعانى ءۇشىن بىرنەشە رەت سوتتالعان 44 جاستاعى ج.ەسىمدى ازامات ويلاپ تاپقان، دەپ حابارلايدى Almaty-akshamy.kz.
Polisia.kzء-تىڭ مالىمەتىنشە، ەر ادامنىڭ جاقسى پسيحولوگ ەكەنى بەلگىلى بولدى، ول اڭگىمەلەسۋشىنىڭ سەنىمىنە وپ-وڭاي كىرەدى ەكەن.
«بۇل جاعدايدا كۇدىكتى ءوزىن مەملەكەتتىك ورگانداردىڭ ءبىرىنىڭ وكىلىمىن دەپ تانىستىردى. ول شىعارماشىلىق ۇجىمدارعا قوڭىراۋ شالىپ، ولاردىڭ جەتەكشىلەرىن ەلورداداعى ۇلكەن كونسەرتتەرگە قاتىسۋعا شاقىرىپ، سونىمەن قاتار جوعارى قالاماقى مەن تولىق انشلاگتى ۋادە ەتكەن. ءبىراق شارانى “ۇيىمداستىرۋشى” الدىمەن ەكى باعىتقا بيلەت قۇنىن جانە بۇكىل ۇجىمنىڭ قوناقۇيدە تۇرۋ اقىسىن تولەۋدى سۇرادى. جابىرلەنۋشىلەردىڭ كەيبىرى بەيتانىس جىگىتپەن ىنتىماقتاسىپ، ونىڭ تالاپتارىن ورىنداعان. سوڭىندا ۋادە ەتىلگەن كونسەرت تە، اقشا دا جوق»، – دەپ مالىمدەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
كۇدىكتىنى بوستاندىق اۋداندىق پب-عا قاراستى پوليسيا ءبولىمى مەن قالالىق كريمينالدىق پوليسيا باسقارماسىنىڭ قىزمەتكەرلەرى ۇستادى. ول ۋۇي-عا قاماۋعا الىندى. پوليسيا ۇستالعان ادامدى تانىعان جاعدايدا، ازاماتتاردان مىنا تەلەفوندار ارقىلى حابارلاسۋدى سۇرايدى: 8-707-515-47-35 جانە 8-700-771-81-77. ق ر قپك-نىڭ 201-بابىنا سايكەس، وزگە اقپاراتتار تەرگەۋ مۇددەسىنە وراي جاريا ەتۋگە جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىقبۇزۋشىلىق جاساۋدا كىناسىز دەپ تانىلادى.