اۋىل شارۋاشىلىعى مينيسترلىگى وبلىس اكىمدىكتەرىمەن بىرلەسىپ الداعى ەگىس ناۋقانىنا قىزۋ دايىندالۋدا.
بيىل اۋىل شارۋاشىلىعى جالپى ءونىمىن ەكى ەسەگە ارتتىرۋ ماقساتىنداعى جول كارتاسىنا ساي، ەگىس القاپتارىن ءارتاراپتاندىرۋ جالعاسادى. بۇل تۋرالى ۇكىمەت وتىرىسىندا اۋىل شارۋاشىلىعى ءمينيسترى ايداربەك ساپاروۆ مالىمدەدى، دەپ حابارلايدى aqshamnews.kz.
«اۋىل شارۋاشىلىعى داقىلدارى 23،8 ملن گەكتار جەرگە ورنالاستىرىلادى، بۇل وتكەن جىلمەن سالىستىرعاندا 518 مىڭ گەكتارعا ارتىق. ءارتاراپتاندىرۋ باعدارلاماسى شامامەن 1 ملن گەكتاردى قامتيدى، سونىڭ ىشىندە جوعارى رەنتابەلدى داقىلداردىڭ القابى 750 مىڭ گەكتارعا ۇلعايتىلادى. اتاپ ايتقاندا، مايلى داقىلدار 365 مىڭ گەكتارعا، جەم-شوپ داقىلدارى 184 مىڭ گەكتارعا، ارپا 114 مىڭ گەكتارعا، قاراقۇمىق 41،5 مىڭ گەكتارعا، كارتوپ 15 مىڭ گەكتارعا كوبەيتىلەدى»، – دەدى مينيستر.
تۇراقتى جەم-شوپ بازاسىن قامتاماسىز ەتۋ ماقساتىندا جەم-شوپ داقىلدارىنىڭ القابىن 3،4 ملن گەكتارعا دەيىن جەتكىزۋ جوسپارلانۋدا. مايلى داقىلداردىڭ كولەمى 3،3 ملن گەكتارعا دەيىن ۇلعايتىلادى. جوسپارلانعان القاپتار ىشكى نارىقتىڭ قاجەتتىلىگىن تولىق قامتاماسىز ەتۋگە مۇمكىندىك بەرەدى.