ءقازىر جىلى كەڭسەدە وتىرىپ جۇمىس ىستەگەندى نەمەسە اقشالى كاسىپكەر بولعاندى قالامايتىن جان جوق. ءبىراق كۇندەلىكتى تىرشىلىگىمىزدىڭ ءارىن كەلتىرىپ وتىرعان قاراپايىم ەڭبەك ادامدارىنىڭ ەڭبەگىن دە دارىپتەپ، باعالاپ، جۇمىسشى ماماندىقتارىنا دا ءبىر ءسات مويىن بۇرعان ابزال.
مەملەكەت باسشىسى جۇمىسشى ماماندىقتاردىڭ بەدەلىن ارتتىرۋ، تەحنيكالىق جانە كاسىپتىك ءبىلىم بەرۋ جۇيەسىن رەفورمالاۋ قاجەتتىگىن العا تارتتى. ءيا، جۇمىسشى ماماندىقتار ءارقاشان سۇرانىسقا يە بولىپ قالا بەرەدى. تەحنيكاداعى اۆتوماتتاندىرۋ جۇيەسىنىڭ دامۋىنا قاراماستان، اۆتومەحانيك، اۆتوەلەكتريك، تىگىنشى سياقتى ءبىرقاتار ماماندىق ماشينالار الماستىرا المايتىن ارنايى ءبىلىم مەن داعدىلاردى، وي-سانانى قاجەت ەتەتىنى ءسوزسىز.
الماتى تەحنولوگيا جانە فلوريستيكا كوللەدجىندەگى بىلىكتى ماماندار دا ستۋدەنتتەردىڭ ساپالى ءبىلىم الۋىنا، ولاردىڭ تاڭداعان ماماندىقتارىن تولىققاندى يگەرىپ شىعۋىنا ۇلەس قوسىپ ءجۇر. ول ءۇشىن ۇستازدار زامان كوشىنەن قالماي، ءوزىنىڭ دە ءبىلىمىن جەتىلدىرۋگە ىنتالى. ەڭبەك نارىعىندا سۇرانىسقا يە ماماندار دايارلاۋ، ستۋدەنتتەردىڭ قۇزىرەتتىلىگىن ارتتىرۋ ماقساتىندا 2023-2024 وقۋ جىلىندا 10 پەداگوگ الماتى قالاسى اكىمدىگى مەن الماتى قالاسى ءبىلىم باسقارماسىنىڭ قولداۋىمەن گەرمانيا، جۇڭگو، يتاليا، نيدەرلانديا مەملەكەتتەرىندە، ال بيىلعى وقۋ جىلىندا 6 ءمۇعالىم تۇركيا مەن وڭتۇستىك كورەيا رەسپۋبليكاسىنىڭ وقۋ ورىندارىندا حالىقارالىق تاعىلىمدامادان ءوتىپ، كاسىبي بىلىكتىلىگىن ارتتىرىپ كەلدى.
جۋىردا شاھاردا حالىقارالىق تاعىلىمدامادان ءوتۋ باعدارلامالارىن جۇزەگە اسىرۋ اياسىندا قالالىق سەمينار ءوتتى. وعان اتالمىش كوللەدج پەداگوگتارى دا قاتىسىپ، شەتەلدەن كورگەن، بىلگەن، ۇيرەنگەنىن ورتاعا سالدى. ماسەلەن، وڭتۇستىك كورەيانىڭ كەمحە قالاسىنداعى كۋكچە تەحنولوگيالىق ينستيتۋتىندا تاعىلىمدامان ءوتىپ كەلگەن كوللەدج ديرەكتورىنىڭ وقۋ-وندىرىستىك ءىسى جونىندەگى ورىنباسارى ايان نۇرعالييەۆ پەن وندىرىستىك وقىتۋ شەبەرى ديانا وماروۆا «قازىرگى زامانعى تەحنولوگيالاردى پايدالانا وتىرىپ، وقۋ-وندىرىستىك پروسەستەردى ۇيىمداستىرۋ» بويىنشا جيعان بىلىمىمەن ءبولىستى. ال جيھاز ءوندىرىسى ماماندىعى بويىنشا وندىرىستىك وقىتۋ شەبەرلەرى الماز شاريپوۆ پەن ايدا بولاتوۆا تۇركيالىق ارىپتەستەرىنەن العان وزىق تاجىريبەسىن ورتاعا سالدى.
·تاقىرىپقا وراي
انار شاريپوۆا، «تىگىن ءوندىرىسى جانە كيىمدەردى ۇلگىلەۋ» ماماندىعى بويىنشا وندىرىستىك وقىتۋ شەبەرى:
جىلدا 400-دەي مامان وقىتىپ شىعارامىز
ەڭبەك نارىعىندا سۇرانىسقا يە ماماندار دايارلاۋدا ءبىزدىڭ الماتى تەحنولوگيا جانە فلوريستيكا كوللەدجىنىڭ ۇلەسى سالماقتى. جىل سايىن 400-دەي جۇمىسشى ماماندىعىن وقىتىپ، ەڭبەك نارىعىنا قاجەت بىلىكتى ماماندار وقىتىپ شىعارامىز. ءبىز، ارىپتەسىم دانيا ادان ەكەۋمىز تۇركيا مەملەكەتىنىڭ دەنيزلي قالاسىنداعى ىرگەلى دوستەك كوللەدجىندە ۇيىمداستىرىلعان تاعىلىمدامادان وتتىك. تۇرىك باۋىرلارىمىز قازىرگى زامانعى تەحنولوگيالاردى، تۇراقتى تاجىريبەنى جانە كيىم-كەشەك سالاسىنداعى ءبىلىم بەرۋ تاسىلدەرىن زەرتتەۋ باعىتىنداعى تاجىريبەلەرىن ءبولىستى. ءبىز دە قاراپ قالماي، وزىمىزدەگى جەتىستىكتەردى، ستۋدەنتتەردى وقىتۋداعى تىڭ جوبالارىمىزدى ايتتىق. بولدىم، تولدىم دەگەن ادام وسپەيدى. ءبىز ەلدىڭ ەرتەڭىن جاسايتىن بىلىكتى ماماندار دايىنداپ شىعارۋ ءۇشىن جاقسىنى ۇيرەنۋدەن، ۇيرەتۋدەن جالىقپايمىز.
