الماتىدا قالا اكىمىنىڭ تاپسىرماسى بويىنشا «2040 جىلعا دەيىن پەرسپەكتيۆادا قالانى جىلۋمەن جابدىقتاۋدى دامىتۋدىڭ 2030 جىلعا دەيىنگى جوسپارى» ازىرلەندى، دەپ حابارلايدى aqshamnews.kz.
بۇل تۋرالى الماتى ەنەرگەتيكا باسقارماسى باسشىسىنىڭ م.ا. نۇرباقىت سەرىكباي ءماسليحاتتىڭ كەزەكتەن تىس XXVII سەسسياسىندا حابارلادى.
قۇجات جىلۋ جەلىلەرىن جاڭعىرتۋ مەن رەكونسترۋكسيالاۋدى، ەسكىرگەن تەحنولوگيالار مەن جابدىقتاردى اۋىستىرۋدى، سونداي-اق پەرسپەكتيۆالى قۇرىلىس اۋداندارىندا جاڭا قازاندىقتار سالۋدى كوزدەيدى.
جوبانى ازىرلەۋ كەزىندە الداعى ونجىلدىقتارعا رەسۋرستاردى ۇتىمدى بولۋگە مۇمكىندىك بەرەتىن جانە ۇزاق مەرزىمدى پەرسپەكتيۆادا جىلۋمەن جابدىقتاۋدىڭ تۇراقتىلىعىنا كەپىلدىك بەرەتىن بولجام جۇزەگە اسىرىلدى.
ايتا كەتەرلىگى، بۇگىندە الماتىدا قولدانىلۋى 25 جىلدان اسقان جىلۋ جەلىلەرىنىڭ ۇلەسى قالانىڭ بالانسىنا يەسىز جەلىلەردى بەرۋ ەسەبىنەن وسۋدە. جىل سايىن 39 كم قۇبىردى قايتا جاڭارتۋ كەزىندە 2040 جىلعا قاراي جەلىلەردىڭ توزۋ دەڭگەيىن 20% - دان استامعا دەيىن تومەندەتۋ جوسپارلانۋدا.
جاڭعىرتۋ اياسىندا اپاتتى جاعدايلاردىڭ تۋىنداۋ تاۋەكەلدەرىن ەداۋىر تومەندەتۋگە جانە كورسەتىلەتىن قىزمەتتەردىڭ ساپاسىن جاقسارتۋعا مۇمكىندىك بەرەتىن جاڭا تەحنولوگيالار مەن شەشىمدەردى ەنگىزۋ كوزدەلگەن.
سونداي-اق، ەسكى قۇبىرلاردى قاشىقتان باسقارىلاتىن وقشاۋلانعان قۇبىرلارعا اۋىستىرۋ جوسپارلانعان، بۇل جىلۋ شىعىنى مەن تەحنيكالىق قىزمەت كورسەتۋ شىعىندارىن ازايتادى. سونداي-اق، ەسكىرگەن بەكىتۋ ارماتۋرالارى زاماناۋي شار كلاپاندارىمەن اۋىستىرىلادى.
«قابىلدانعان شارالار جىلۋمەن جابدىقتاۋ سەنىمدىلىگىن ارتتىرۋعا، جاڭا تۇتىنۋشىلارعا ۇزدىكسىز جىلۋ بەرۋدى قامتاماسىز ەتۋگە جانە پايدالانۋ شىعىندارىن ازايتۋعا مۇمكىندىك بەرەدى»، - دەپ تۇيىندەدى ءسوزىن نۇرباقىت سەرىكباي.