قىرعىزستانداعى «كاركىرا-اۆتودوروجنىي» وتكىزۋ پۋنكتى 2025 جىلدىڭ 25 تامىزىنان باستاپ تاۋلىك بويى جۇمىس ىستەۋ تارتىبىنە كوشتى.
بۇل شەشىم قىرعىزستان پرەزيدەنتى سادىر جاپاروۆ پەن قازاقستان پرەزيدەنتى قاسىم-جومارت توقايەۆتىڭ قىرعىزستانعا رەسمي ساپارى بارىسىندا وتكەن كەلىسسوزدەردىڭ ناتيجەسىندە قابىلداندى. جاڭا رەجيمنىڭ ەنگىزىلۋى ەكى ەلدىڭ دوستىق قاتىناستارىن نىعايتىپ، ەكونوميكالىق ىنتىماقتاستىقتى دامىتۋعا دەگەن ۇمتىلىسىن كورسەتەدى.
وتكىزۋ پۋنكتىنىڭ جاڭا جۇمىس رەجيمىنە كوشۋىنە ارنالعان سالتاناتتى ءراسىم وتكىزۋ پۋنكتىنىڭ اۋماعىندا ءوتىپ، وعان ەكى ەلدىڭ جوعارى لاۋازىمدى وكىلدەرى قاتىستى. قىرعىز تاراپىنان ۇقك شەكارا قىزمەتى ءتوراعاسىنىڭ ءبىرىنشى ورىنباسارى ابديكاريم اليمبايەۆ كەلسە، قازاقستان دەلەگاسياسىن ۇقك شەكارا قىزمەتى ديرەكتورىنىڭ ورىنباسارى ت. ءجۇنىسوۆ باستاپ باردى. سونداي-اق شاراعا شەكارا ماڭىنداعى اۋىلداردىڭ اقساقالدارى دا قاتىستى.
ءوز سوزىندە اليمبايەۆ وتكىزۋ پۋنكتىنىڭ تاۋلىك بويعى جۇمىس تارتىبىنە كوشۋى – شەكارادان ءوتۋ راسىمدەرىن جەڭىلدەتىپ، تۋريزم مەن ساۋدانىڭ دامۋىنا جول اشاتىن ستراتەگيالىق ماڭىزدى قادام ەكەنىن اتاپ ءوتتى. دەلەگاسيالار ەكى ەلدىڭ وتكىزۋ پۋنكتتەرىن ارالاپ، ولاردىڭ جۇمىسىمەن تانىستى. ءىس-شارا كونسەرتتىك باعدارلاماعا ۇلاستى.
ىستىقكول وبلىسىنىڭ ءتۇپ اۋدانىندا ورنالاسقان «كاركىرا-اۆتودوروجنىي» وتكىزۋ پۋنكتى ادامدار مەن كولىك قۇرالدارىن وتكىزۋگە ارنالعان. 2026 جىلى زاماناۋي شەكارالىق ينفراقۇرىلىم نىساندارىن سالۋ جوسپارلانىپ وتىر، بۇل وتكىزۋ مۇمكىندىگىن ارتتىرىپ، شەكارالىق باقىلاۋدىڭ تيىمدىلىگىن جاقسارتۋعا مۇمكىندىك بەرەدى.