القابيلەر سوتىنا جاتپايتىن ىستەردىڭ ساناتى بار.
ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆ القابيلەر سوتىنا جۇگىنە المايدى. بۇل تۋرالى ق ر جوعارعى سوتىنىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيد جۇكەنوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىن پارلامەنت ماجىلىسىندە تىلشىلەر ءا.جۇكەنوۆتەن ۇلتتىق قاۋىپسىزدىك كوميتەتىنىڭ بۇرىنعى ءتوراعاسىنىڭ القابيلەر سوتىنا جۇگىنۋ مۇمكىندىگى تۋرالى سۇرادى.
«وعان قاتىستى قوزعالىپ جاتقان ىستەر بويىنشا القابيلەر سوتىنا جۇگىنە المايدى. اتاپ ايتقاندا، القابيلەر سوتىنا جاتپايتىن ىستەردىڭ ساناتى بار. بۇل باعىتتاعى قادامدار زاڭمەن رەتتەلۋى كەرەك. ءبىز زاڭ اياسىندا جۇمىس ىستەيمىز. زاڭ وزگەرسە، نەگىز بولادى. ءقازىر بۇل ىستەر قۇپيا قارالادى جانە قۇپيا تۇردە ساقتالادى. مەنىڭ ويىمشا، ءىس بويىنشا ءتيىستى اقپارات جاريالانادى. كەز كەلگەن مەملەكەتتە ۇلتتىق قاۋىپسىزدىكتى قورعاۋ بار جانە مەملەكەت كەيبىر اقپاراتتى قۇپيا ساقتاۋعا قۇقىلى»، - دەپ تۇيىندەدى ءابدىراشيد جۇكەنوۆ.