ناعىز باتىر!
قازاق سپورتىنىڭ ارعى-بەرگى تاريحىندا كاراتەدەن جەتىستىككە جەتكەن بىردەن-بىر ازامات دارحان ءاسادىلوۆ دەپ ايتساق قاتەلەسپەيمىز.
توكيو وليمپياداسىندا تۇڭعىش رەت كاراتەدەن قولا جۇلدەگەر اتاندى. ءسويتىپ، قازاقتىڭ ابرويىن كوككە كوتەردى. بۇعان دەيىن وليمپيادالىق ويىندا مۇنداي جەتىستىكتى بايقامادىق. بايراقتى باسەكەدە ەل نامىسىن اسقاقتاتقان ناعىز ەر دەپ بىلەمىز. الەم جۇرتشىلىعى الدىندا ۇلتىمىزدىڭ قايسار ۇلى ەكەندىگىن مويىنداتتى.
دارحان بۇعان دەيىن تالاي جارىستاردا توپ جارىپ ءجۇردى. دەگەنمەن، بۇل جولعى جەڭىستىڭ ءجونى بولەك. قازاقتىڭ كاراتە ونەرىندە – وزىندىك دارا جولىن سالدى. سونداي-اق، سپورت تاريحىندا اتى التىن ارىپپەن قالدى. وسىنداي قاراكوزدەرىمىز وتانىنىڭ باعى جولىندا، بارىن سالىپ، جان اياماي باسەكەگە ءتۇسىپ جاتقاندا، ەلدەگى جانكۇيەرلەر تاقىم قىستى. ۇيدە وتىرىپ، كوك جاشىكتەن تاماشالاسا دا، ءۇمىتى مەن ارماندارى جەڭىس تۇعىرىنان ءوز ۇلدارىن كورۋ بولاتىن. سول ءۇمىتتى ءبىرقاتار سپورتشىلار اقتادى. بىزدەرگە سىناۋ مەن مىنەۋ وڭاي. دەسەدە، ولار كۇنى-تۇنى دايىندالىپ، ەل ىشىلىك جارىستاردان وتەدى. ودان سوڭ، ازيا مەن الەم بىرىنشىلىكتەرىنە قاتىناسادى. وسىلايشا، جەڭىسكە دەگەن قادامدارىن جالعايدى. اراسىنان باعى مەن بابى قاتار شاپقاندارى توپ جارادى. اتالعان مىسالداردى ارنايى ايتۋدامىز. وتانداسىمىز دا وسى كەلتىرىلگەن ساتىلاردان ءوتىپ، ءوز-وزىن دالەلدەدى.
دارحان باۋىرىمىزعا جەڭىسى ءۇشىن – مىڭ راقمەت!