بۇل تۋرالى بۇگىن وتكەن «اعىمداعى ەپيدەميولوگيالىق جاعداي جانە COVID-19-دىڭ تارالۋىن الدىن الۋ تۋرالى» اتتى ونلاين باسپاسوز-كونفەرەنسياسىندا الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ مالىمدەدى.
قالاداعى ەپيداحۋالعا تولىق توقتالىپ، جاعدايدى تۇسىندىرگەن باسقارما باسشىسى قىتايدىڭ Sinopharm كومپانياسىنىڭ Vero Cell ۆاكسيناسى تۋرالى دا ماعلۇمات بەردى، دەپ حابارلايدى Almaty-akshamy.kz ءتىلشىسى.
«ددسۇ بۇل ۆاكسينانى ماقۇلداعان، ونىڭ تيىمدىلىگىن 72 % دەپ باعالاعان. بۇل دا قىتايدىڭ Sinopharm كومپانياسىنىڭ ءونىمى. جاناما اسەرى دە، ەكپەدەن كەيىنگى جاعداي دا ءدال باسقا ۆاكسينالارعا ۇقساس. كەي جاعدايلاردا جۇرەك اينۋ، قۇسۋ، السىزدىك، ۇيقى باسۋ سياقتى اسەرلەرى بايقالادى»، دەدى ناريمان تابىنبايەۆ.
Vero Cell ۆاكسيناسىن 18 جاسقا تولعان ادامدارعا سالۋ ۇسىنىلعان. Vero Cell ۆاكسيناسىنىڭ ءبىر دوزاسى – 0،5 ميلليليتر. ۆاكسينانىڭ ەكى دوزاسىن سالدىرۋ ۇسىنىلادى. ەكەۋىنىڭ اراسى 3-4 اپتا نەمەسە 21-28 كۇن بولۋى قاجەت.
«قالاداعى ەكپە الۋ پۋنكتتەرىندە وسى ۆاكسيناعا تۇرعىندار سۇرانىسى ارتىپ وتىر. بۇگىنشە ءبىزدىڭ قولىمىزداعى مالىمەت بويىنشا، 27 ادام ءدال وسى ەكپەنى الدى»، -دەدى باسقارما باسشىسى.