پرەزيدەنت قاسىم-جومارت توقايەۆ كورەيا رەسپۋبليكاسىنىڭ پرەزيدەنتى مۋن چجە ينمەن كەلىسسوزدەر جۇرگىزدى
وڭتۇستىك كورەيا پرەزيدەنتىنىڭ رەزيدەنسياسىندا رەسمي دەلەگاسيا مۇشەلەرىنىڭ قاتىسۋىمەن مەملەكەت باسشىسى قاسىم-جومارت توقايەۆ پەن پرەزيدەنت مۋن چجە ين كەلىسسوزدەر وتكىزدى دەپ حابارلايدى almaty-akshamy.kz akorda.kz سىلتەمە جاساپ.
تاراپتار قازاق-كورەي ستراتەگيالىق ارىپتەستىگىن ودان ارى دامىتۋدىڭ پەرسپەكتيۆالارىن جان-جاقتى تالقىلادى. ساۋدا-ەكونوميكالىق، ينۆەستيسيالىق جانە مادەني-گۋمانيتارلىق بايلانىستاردى نىعايتۋعا ەرەكشە كوڭىل ءبولىندى.
سونىمەن قاتار مەملەكەتتەر باسشىلارى عالامدىق جانە ايماقتىق وزەكتى ماسەلەلەردى قاراستىرىپ، حالىقارالىق قۇرىلىمدارداعى ءوزارا ىنتىماقتاستىقتى تالقىلادى.
قاسىم-جومارت توقايەۆ پرەزيدەنت مۋن چجە ينگە كورەي جەرىندە كورسەتىلگەن قۇرمەت پەن قوناقجايلىعى ءۇشىن ريزاشىلىعىن ءبىلدىردى.
مەملەكەت باسشىسى 2019 جىلى نۇر-سۇلتان قالاسىندا وتكەن كەزدەسۋدىڭ قازاق-كورەي قارىم-قاتىناسىنا تىڭ سەرپىن بەرگەنىن ايتتى.
قاسىم-جومارت توقايەۆ وڭتۇستىك كورەيا قازاقستاننىڭ ازياداعى ەڭ ماڭىزدى ستراتەگيالىق ارىپتەسى ەكەنىن اتاپ ءوتتى.
– بۇگىنگى تاڭدا قازاقستاننىڭ ەكونوميكاسىنا 6 ملرد دوللاردان استام كورەيلىك ينۆەستيسيا تارتىلعان. ينۆەستيسيا تارتۋ ءىسىن بۇدان بىلاي دا جالعاستىرا بەرۋ كەرەك دەپ ويلايمىن. مەن وسىدان ەكى جىل بۇرىن ءوزارا بايلانىستارىمىزدى ارتتىرۋ ءۇشىن اۋقىمدى جوبا قۇرۋ كەرەك ەكەنىن سىزگە ايتقانمىن. ءقازىر قازاقستاندا كورەيالىقتار قارجى سالعان 550 كومپانيا جۇمىس ىستەپ جاتىر. ولاردىڭ اراسىندا Samsung، Hyundai، Lotte، Posko جانە تاعى باسقالارى بار. وتە جاقسى ينستيتۋسيونالدى بازا قالىپتاسقان، ۇكىمەتارالىق كوميسسيا مەن ىسكەرلىك كەڭەس جۇمىس ىستەپ جاتىر، – دەدى قازاقستان پرەزيدەنتى.
مەملەكەت باسشىسى كورەيالىق ارىپتەسىنە كوروناۆيرۋسپەن كۇرەستە كورسەتكەن گۋمانيتارلىق كومەگى ءۇشىن العىس ايتىپ، قازاقستاندىق QazVac ۆاكسيناسى تۋرالى اقپاراتپەن ءبولىستى.
قاسىم-جومارت توقايەۆ وڭتۇستىك كورەيانىڭ جوعارى تەحنولوگيالار مەن دەنساۋلىق ساقتاۋ سالاسىن دامىتۋ تاجىريبەسىنە قىزىعۋشىلىق تانىتتى.
وڭتۇستىك كورەيا پرەزيدەنتى پاندەميا باستالعالى بەرى وسىنداي جوعارى دەڭگەيدەگى كەزدەسۋدى ەڭ ءبىرىنشى بولىپ قازاقستان پرەزيدەنتىمەن وتكىزىپ جاتقانىن اتاپ ءوتتى.
– ءسىزدى كوپ كۇتكەن اسا ءقادىرلى قوناق رەتىندە كۇتىپ العانىما قۋانىشتىمىن. ءبىزدىڭ كەزدەسۋىمىزدىڭ قازاقستان تاۋەلسىزدىگىنىڭ 30 جىلدىعى مەن كورەي رەسپۋبليكاسى تاۋەلسىزدىگىنىڭ 76 جىلدىعى قارساڭىندا ءوتىپ جاتقانى اسا ماڭىزدى، – دەدى پرەزيدەنت مۋن چجە ين.
وڭتۇستىك كورەيا پرەزيدەنتى مۋن چجە ين قاسىم-جومارت توقايەۆقا جانە قازاقستان حالقىنا كورەيانىڭ ۇلتتىق باتىرلارى، ەل تاۋەلسىزدىگى ءۇشىن كۇرەسكەن گە بون ۋ، حۆان ۋن دەنا جانە گەنەرال حون بون دونىڭ سۇيەكتەرىن تاريحي وتانىنا جەتكىزۋگە ىقپال ەتكەنى ءۇشىن ريزاشىلىعىن ءبىلدىردى.
كورەي باسشىسى ايماقتىق جانە حالىقارالىق ۇدەرىستەردە قازاقستاننىڭ اسا ماڭىزدى ءرول اتقاراتىنىن اتاپ ءوتتى.
– قازاقستان تاۋەلسىزدىك العاننان كەيىن سىرتقى ساياساتتا اشىق ءارى تىعىز بايلانىس ورناتىپ، بەلسەندىلىك تانىتۋ ارقىلى ورتالىق ازياداعى قىرقىندى دامۋشى مەملەكەتكە اينالدى. سونىمەن قاتار قازاقستان ازياداعى ءوزارا ىنتىماقتاستىق جانە سەنىم شارالارى جونىندەگى كەڭەس ارقىلى جانە دۇنيەجۇزىلىك ساۋدا ۇيىمىنداعى مينيسترلەر كونفەرەنسياسىنىڭ تەڭتوراعاسى رەتىندە دە كوپجاقتى ىنتىماقتاستىقتىڭ ءارتۇرلى تەتىكتەرىندە بەلسەندى كوشباسشىلىق تانىتىپ كەلەدى. قازاقستان كورەيا رەسپۋبليكاسىنىڭ ورتالىق ازياداعى ەڭ العاشقى ساۋدا جانە ينۆەستيسيالىق ارىپتەسى. ەلدەرىمىز اراسىنداعى ديپلوماتيالىق بايلانىستار ورناعان 30 جىل ىشىندە ءبىزدىڭ قاتىناسىمىز تەك قانا دوستىق پەن ىنتىماقتاستىققا نەگىزدەلدى. ءتىپتى، پاندەميا كەزىندە دە ءبىز بارلىق دەڭگەيدە سىرتتاي بايلانىس ورناتىپ وتىردىق. قازاقستان كورەيانىڭ «جاڭا سولتۇستىك ساياسات» مەملەكەتتىك ستراتەگياسىندا اسا ماڭىزدى ارىپتەس. ءبىزدىڭ ءوزارا ىنتىماقتاستىعىمىزدىڭ الەۋەتى بۇنىمەن دە بىتپەيدى دەپ ەسەپتەيمىن، – دەدى وڭتۇستىك كورەيا پرەزيدەنتى.
مۋن چجە ين ەكى ەلدى بايلانىستىراتىن ەرەكشە قارىم-قاتىناستاردى اتاپ ءوتتى.
– كورەي حالقىنىڭ قازاقستان حالقىنا دەگەن ىقىلاس-پەيىلى ەرەكشە. ءبىز ءۇشىن قازاقستان ەۋرازيا قۇرلىعىنىڭ ورتالىعى بولىپ سانالادى. ءبىزدىڭ حالىقتارىمىزدىڭ تاريحي بايلانىسى سوناۋ ۇلى جىبەك جولىنان تارتىپ، كەيىنگى ەتنيكالىق كورەيلەردى قازاقستانعا جەر اۋدارۋمەن جالعاستى. ءبىز قيىر شىعىستان جەر اۋدارىلىپ بارعان كورەيلەردى ءوزىنىڭ ىستىق قۇشاعىن جايىپ قارسى العان قازاق حالقىنىڭ كەڭ پەيىلدىگىن ەشقاشان ۇمىتپايمىز، العىسىمىز شەكسىز، – دەدى وڭتۇستىك كورەيا پرەزيدەنتى.
كەلىسسوزدەردىڭ قورىتىندىسى بويىنشا مەملەكەتتەر باسشىلارىنىڭ قاتىسۋىمەن ءبىرقاتار ەكىجاقتى قۇجاتقا قول قويىلدى:
1. قازاقستان رەسپۋبليكاسى مەن كورەيا رەسپۋبليكاسىنىڭ بىرلەسكەن مالىمدەمەسى (اۋىزشا قابىلداندى)؛
2. قازاقستان رەسپۋبليكاسىنىڭ مادەنيەت جانە سپورت مينيسترلىگى مەن كورەيا رەسپۋبليكاسىنىڭ ىشكى ىستەر جانە قاۋىپسىزدىك مينيسترلىگى اراسىنداعى مۇراعات ءىسى سالاسىنداعى ءوزارا تۇسىنىستىك تۋرالى مەموراندۋم؛
3. قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى مەن كورەيا رەسپۋبليكاسىنىڭ ساۋدا، يندۋستريا جانە ەنەرگەتيكا مينيسترلىگى اراسىنداعى ءوزارا تۇسىنىستىك تۋرالى مەموراندۋم؛
4. قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگى مەن كورەيا رەسپۋبليكاسىنىڭ قورشاعان ورتا مينيسترلىگى اراسىنداعى سۋ رەسۋرستارىن باسقارۋ سالاسىنداعى ءوزارا تۇسىنىستىك تۋرالى مەموراندۋم؛
5. قىزىلوردا وبلىسى اكىمدىگى مەن كورەيا رەسپۋبليكاسىنىڭ ارداگەرلەر مەن پاتريوتتار جونىندەگى اگەنتتىگى اراسىنداعى ءوزارا تۇسىنىستىك تۋرالى مەموراندۋم؛
6. «سامۇرىق-قازىنا» ءۇاق» اق مەن كورەيا حالىقارالىق ساۋدا قاۋىمداستىعى (KITA) اراسىنداعى ىنتىماقتاستىق تۋرالى مەموراندۋم.