وقۋشىلاردىڭ اراسىندا سىرقاتتانۋشىلىقتىڭ كۇرت وسۋىنە جول بەرمەۋ ءۇشىن سانيتارلىق-ەپيدەميولوگيالىق تالاپتاردىڭ ساقتالۋىن قامتاماسىز ەتۋ قاجەت. بۇل تۋرالى بۇگىن ۇكىمەت وتىرىسىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«حالىقارالىق تاجىريبەنى ەسكەرە وتىرىپ جانە ەلدەگى كۇردەلى ەپيدەميولوگيالىق جاعدايعا بايلانىستى ءبىلىم جانە عىلىم مينيسترلىگى مەن بىرىككەن ۇلتتار ۇيىمى بالالار قورىنىڭ ۇسىنىمدارى بويىنشا ءبىلىم بەرۋ ۇيىمدارىندا وقىتۋ فورماتى قايتا قارالدى. ماسەلەن، بارلىق مەكتەپكە دەيىنگى ۇيىمدار، باستاۋىش سىنىپ جانە قۋاتى 600 وقۋشىعا دەيىنگى مەكتەپ شتاتتىق فورماتتا جۇمىس جاسايدى»، - دەدى اجار عينيات.
ءمينيستردىڭ اتاپ وتۋىنشە، 600-دەن استام وقۋشىسى بار ءبىلىم بەرۋ ۇيىمدارىندا تولتىرۋ 50 پايىزدان اسپاۋ كەرەك. باستاۋىش مەكتەپ وقۋشىلارى شتاتتىق رەجيمدە ءبىلىم الادى. بۇل رەتتە وقىتۋ فورماتىن تاڭداۋ كەزىندە مىندەتتى تۇردە ۆاكسينالاۋمەن قامتۋ دەڭگەيى ەسكەرىلەدى. ال جوعارى وقۋ ورىندارى مەن كوللەدجدەردە دە سارالانعان ءتاسىل ەنگىزىلگەن: لەكسيالار – ونلاين، قالعان ساباقتار يكەمدى كەستە بويىنشا شتاتتىق رەجيمدە وتەدى.
«بۇل رەتتە، بالالاردىڭ اراسىندا دا جرۆي مەن كۆي-دەن سىرقاتتانۋشىلىقتىڭ 1،3 ەسە كوبەيىپ وتىرعانىن ەسكەرىپ، سانيتارلىق-ەپيدەميولوگيالىق قاداعالاۋ ورگاندارى كارانتيندىك شارالاردىڭ ورىندالۋىنا مونيتورينگتى جالعاستىراتىنىن جانە بۇزۋشىلىقتار انىقتالعان جاعدايدا، وقىتۋ ونلاين فورماتقا اۋىستىرىلاتىنىن اتاپ وتكەن ءجون. وسىعان بايلانىستى، وبلىستاردىڭ، الماتى، نۇر-سۇلتان جانە شىمكەنت قالالارىنىڭ اكىمدىكتەرى وقۋشىلاردىڭ اراسىندا سىرقاتتانۋشىلىقتىڭ كۇرت وسۋىنە جول بەرمەۋ ءۇشىن ءبىلىم بەرۋ ۇيىمدارىندا سانيتارلىق-ەپيدەميولوگيالىق تالاپتاردىڭ ساقتالۋىن قامتاماسىز ەتۋى قاجەت»، - دەدى ول.