ساناۋلى كۇندەردەن كەيىن وڭتۇستىك كورەيادا الاۋى تۇتاناتىن قىسقى جاسوسپىرىمدەر وليمپياداسىنىڭ اشىلۋ سالتاناتىندا ەلىمىزدىڭ كوك تۋىن ۇستاپ شىعاتىن سپورتشىلار بەلگىلى بولدى. «مەملەكەتتەر شەرۋى» كەزىندە قازاقستاننىڭ بايراعىن پەتروپاۆلدىق كونكيمەن جۇگىرۋ سپورتىنىڭ وكىلى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان ۇستاپ شىعادى. اتالعان سپورتشىلار جارىستارداعى جوعارى جەتىستىكتەرى ءۇشىن عانا ەمەس، سونىمەن قاتار حالىقارالىق ارەناداعى جەڭىسكە دەگەن جىگەرى ءۇشىن تاڭدالدى. ون سەگىز جاسار كريستينا شۋماكوۆا كونكيمەن جۇگىرۋ سپورتىنان ق ر سپورت شەبەرى، ءوزىنىڭ جاس ساناتىنداعى قازاقستان رەسپۋبليكاسىنىڭ چەمپيونى، 2023 جىلعى الەم كۋبوگىنىڭ يتالياندىق كەزەڭىنىڭ كۇمىس جۇلدەگەرى. ون جەتى جاسار ەراسىل شىڭعىسحان شورت-ترەكتەن سپورت شەبەرىنە كانديدات، ءوزىنىڭ جاس ساناتىنداعى قازاقستان رەسپۋبليكاسىنىڭ چەمپيونى، سونداي-اق «ازيا بالالارى» 2023 حالىقارالىق جارىسىنىڭ كۇمىس جۇلدەگەرى.
«بۇل – مەن ءۇشىن وتە اسەرلى ءسات. جاسوسپىرىمدەردىڭ قىسقى وليمپياداسىندا قازاقستاندى تانىستىرۋ – ابىرويلى مىندەت قانا ەمەس، ۇلكەن جاۋاپكەرشىلىك. مەن جارىس جولىندا بار كۇش-جىگەرىمدى سالۋعا ۋادە بەرەمىن. ءتورت جىلدىقتىڭ باستى دوداسىنا قاتىساتىن ءارقايسىمىز وليمپيادا مەدالىن جەڭىپ العىمىز كەلەدى جانە بۇل ويىندار ءبىزدىڭ وسى ماقساتقا جەتۋ جولىنداعى تاماشا مۇمكىندىگىمىز»، - دەپ ءوز اسەرىمەن ءبولىستى كريستينا شۋمەكوۆا.
شورت-ترەكتەن قازاقستان قۇراماسىنىڭ مۇشەسى ەراسىل شىڭعىسحان دا ءوز ويىن ورتاعا سالدى: «مەن ءۇشىن تۋ ۇستاۋشى بولۋ – ۇلكەن جاۋاپكەرشىلىك. ءبىزدىڭ ۇلتتىق قۇراما سپورتشىلارى الداعى بايراقتى باسەكەگە دايىن جانە ءبىز وڭتۇستىك كورەياداعى جارىستا ەل نامىسىن ابىرويمەن قورعايتىنىمىزعا سەنىمدىمىن. جاسوسپىرىمدەر وليمپياداسىنا قاتىسۋ – ءارقايسىمىز ءۇشىن زور تاجىريبە، كاسىبي سپورتشى رەتىندە وسۋىمىزگە مول مۇمكىندىك».
وليمپيادا ويىندارىنا دايىندىق بويىنشا شتاب باسشىسى ەلسيار قاناعاتوۆ تۋ ۇستاۋشىلاردىڭ دۇرىس تاڭدالعانىنا سەنىمدى ەكەنىن جەتكىزدى: «كريستينا مەن ەراسىل – ءبىزدىڭ مىقتى ءارى ۇيىمشىل كوماندامىزدىڭ جارقىن وكىلدەرى. ولاردىڭ كاسىبيلىگى، ىنتا-جىگەرى مەن سپورتقا دەگەن ادالدىعى وڭتۇستىك كورەياعا باراتىن جاسوسپىرىمدەر قۇراماسى مۇشەلەرىنىڭ بويىنان ەڭ جاقسى قاسيەتتەرى دالەلدەپ تۇر. اتالعان سپورتشىلار – ەل سپورتىنىڭ جاڭا بۋىنى، ءبىز ولاردىڭ قىسقى جاسوسپىرىمدەر وليمپياداسىندا ونەر كورسەتۋىن اسىعا كۇتەمىز. سونىمەن قاتار جاس سپورتشىلار ويىندارعا قاتىسۋ ارقىلى تەك تاجىريبە جيناپ قانا قويماي، ءوز شەبەرلىكتەرىن شىڭداۋ جولىندا قۇندى ساباق الادى دەپ ۇمىتتەنەمىز».
ايتا كەتەيىك، كانۆون-2024 IV قىسقى جاسوسپىرىمدەر وليمپياداسى 19 قاڭتاردادان 1 اقپانعا دەيىن وڭتۇستىك كورەيانىڭ كانۆون پروۆينسياسىندا وتەدى. ازيا قۇرلىعىندا العاش رەت ۇيىمداستىرىلىپ جاتقان جاسوسپىرىمدەردىڭ قىسقى وليمپياداسىنا الەمنىڭ 50 ەلىنەن 1800 سپورتشى قاتىسادى دەپ جوسپارلانعان. 7 سپورت تۇرىنەن (15 باعدارلاما) 81 مەدال جيىنتىعى ساراپقا سالىنادى. قازاقستان قۇراماسىنىڭ 42 سپورتشىسى 5 سپورت ءتۇرى بويىنشا ب ا ق سىنايدى.