XVII حالىقارالىق «ەۋرازيا» كينوفەستيۆالىنىڭ باستى قوناعى نۋري بيلگە دجەيلان بولادى. بۇل تۋرالى بۇگىن الماتى قالاسىنىڭ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ءمالىم بولدى، دەپ حابارلايدى aqshamnews.kz.
تۇركيانىڭ اتاقتى رەجيسسەرى دجەيلان كانن كينوفەستيۆالىندە بىرنەشە رەت جوعارى ماراپاتتارعا يە بولعان. ونىڭ «قىسقى ۇيقى» اتتى ءفيلمى 2014 جىلى فەستيۆالدىڭ ەڭ جوعارى جۇلدەسى – «التىن پالما بۇتاعى» جۇلدەسىن جەڭىپ الدى. بۇدان بولەك، ونىڭ «بىردە اناتوليادا» فيلمدەرى قازىلار القاسىنىڭ باس جۇلدەسىن يەلەنسە، 2008 جىلى «ءۇش مايمىل» تۋىندىسى ءۇشىن «ۇزدىك رەجيسسەر» اتاعىن الدى.
«نۋري بيلگە دجەيلان – الەمدىك كينەماتوگرافيانىڭ مويىندالعان شەبەرى، تۇركيانىڭ بەدەلدى رەجيسسەرلەرىنىڭ ءبىرى. ونىڭ تۋىندىلارى الەمنىڭ ەڭ ءىرى كينوفەستيۆالدەرىن باعىندىردى. 2024 جىلى دجەيلان «ەۋرازيا» كينوفەستيۆالىنىڭ حالىقارالىق بايقاۋىنىڭ قازىلار القاسىنا ءتوراعالىق ەتەدى»، – دەپ اتاپ ءوتتى ديانا ءاشىموۆا.
سونىمەن قاتار، نۋري بيلگە دجەيلاننىڭ شىعارمالارى باسقا دا بەدەلدى كينوفەستيۆالدەردە جوعارى باعالاندى. ونىڭ 2000 جىلى تۇسىرىلگەن «مامىر بۇلتتارى» ءفيلمى ەۋروپالىق كينو اكادەميانىڭ فيپرەسسي سىيلىعىنا يە بولدى. دجەيلاننىڭ جالپى سانى 97 حالىقارالىق ماراپاتى بار.
نۋري بيلگە دجەيلان 1959 جىلى 26 قاڭتاردا ىستامبۇلدا دۇنيەگە كەلگەن. ونى كوبىنەسە تەرەڭ مازمۇندى، پوەتيكالىق ءارى ينتەللەكتۋالدىق تۋىندىلارمەن بايلانىستىرادى. رەجيسسەر ءوزىنىڭ ەرەكشە ستيلىمەن تانىمال. ونىڭ فيلمدەرىندە كوركەمدىك ەستەتيكا مەن فيلوسوفيالىق تولعانىستار ۇيلەسىم تاپقان. شىعارمالاردىڭ باسىم بولىگى ۋاقىت، جالعىزدىق، ەستەلىك پەن ادام تابيعاتى تۋرالى سىر شەرتەدى.
«ەۋرازيا» كينوفەستيۆالىنىڭ حالىقارالىق بايقاۋىنىڭ قازىلار القاسىنىڭ ءتوراعاسى رەتىندە نۋري بيلگە دجەيلان شىعىس پەن باتىس مادەنيەتىن توعىستىرىپ، كينەماتوگرافياعا ءوز كوزقاراسىن ۇسىنادى.
ءداستۇرلى فەستيۆالدىڭ نەگىزىن قالاۋشى جانە ۇيىمداستىرۋشى – ق ر مادەنيەت جانە اقپارات مينيسترلىگى. كينوفەستيۆالدى تىكەلەي ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا جۇكتەلگەن.