قازاق ۇلتتىق قىزدار پەداگوگيكالىق ۋنيۆەرسيتەتىندە بەلگىلى عالىم-لينگۆيست، فيلولوگيا عىلىمدارىنىڭ دوكتورى، پروفەسسور ۆالەنتينا يۆانوۆنا جۇماعۇلوۆانىڭ 70 جىلدىق مەرەيتويى اتالىپ ءوتتى، دەپ حابارلايدى aqshamnews.kz.
قازاقستان جۋرناليستەر وداعى سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرىنە ارنالعان «بىت پەداگوگوم ي ۋچەنىم – يسكۋسستۆو وتداۆات» اتتى سالتاناتتى جيىنعا بەلگىلى مەملەكەتتىك قايراتكەرلەر، عالىمدار مەن اكادەميالىق قاۋىم وكىلدەرى قاتىستى.
«ۆالەنتينا يۆانوۆنا جۇماعۇلوۆامەن عىلىمي جۇمىس بابى بويىنشا ءجيى كەزدەسەمىز. سونىمەن قاتار ءبىز – وتباسىلىق دوستارمىز. ول كىسى وتە جارقىن تۇلعا. ءبىر عالىم دەگەن – ءبىر مەملەكەت. وسىنداي ءجۇز عالىم بولسا، ءجۇز مەملەكەتتىڭ ماسەلەسى شەشىلەدى. ۆالەنتينا يۆانوۆانى بۇگىنگى 70 جىلدىق مەرەيتويىمەن قۇتتىقتاي وتىرىپ، بيىك بەلەستەردى باعىندىرا بەرۋىن تىلەيمىن»، – دەدى قازاقستان يننوۆاسيالىق جانە تەلەكوممۋنيكاسيالىق جۇيەلەر ۋنيۆەرسيتەتىنىڭ پرەزيدەنتى، قازاقستان رەسپۋبليكاسى ۇلتتىق ينجەنەرلىك اكادەمياسىنىڭ اكادەميگى اقسەرىك ءايتىموۆ.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى گۇلميرا قاناي ۆالەنتينا يۆانوۆنانى 70 جىلدىق مەرەيتويىمەن قۇتتىقتاي وتىرىپ، ۋنيۆەرسيتەتتىڭ دامۋىنا قوسقان ۇلەسى ءۇشىن مەدال تابىس ەتتى.
سالتاناتتى جيىندا قورقىت اتا اتىنداعى قىزىلوردا ۋنيۆەرسيتەتىنىڭ باسقارما ءتوراعاسى – رەكتورى، فيلولوگيا عىلىمدارىنىڭ كانديداتى، ۆالەنتينا جۇماعۇلوۆانىڭ شاكىرتى بەيبىتكۇل كارىموۆا ۇستازىنا العىس ايتىپ، ىستىق لەبىزىن جەتكىزدى.
«ۇستازىمنىڭ ومىرىمدە الار ورنى ەرەكشە. ۆالەنتينا يۆانوۆنا مەنىڭ اتا-انامنان كەيىنگى ەڭ جاقىن ادامىم دەسەم، ارتىق ايتقانىم ەمەس. سەبەبى ماعان ومىرلىك جول كورسەتىپ، تۇلعا بولىپ قالىپتاسۋىما ءوز سەپتىگىن تيگىزدى. وتە سابىرلى، ادامگەرشىلىگى مول، ءبىلىمدى، سىپايى جان. وسى قاسيەتتەرى – بارشامىزعا ۇلگى. قازاقتىڭ كەلىنى قانداي بولۋ كەرەك دەسە، ۆالەنتينا جۇماعۇلوۆانى كورسەتەر ەدىم. ماعان بەرگەن ءبىلىمى مەن تاربيەسى ءۇشىن ۇستازىما ايتار العىسىم شەكسىز»، – دەدى بەيبىتكۇل سارسەمحان قىزى.
سالتاناتتى شارا اياسىندا پروفەسسور ۆالەنتينا يۆانوۆنانىڭ عىلىمي جۇمىستارىنىڭ كورمەسى ۇسىنىلادى. وندا عالىمنىڭ وقۋ تاجىريبەسىندە قولدانىلىپ، بولاشاق مۇعالىمدەردى جاڭا بىلىممەن بايىتاتىن عىلىمي-زەرتتەۋ يدەيالارى باياندالعان. سونداي-اق عالىمنىڭ عىلىمي-پەداگوگيكالىق قىزمەتىنە ارنالعان كىتاپتىڭ تۇساۋكەسەرى ءوتتى. كىتاپتىڭ لەنتاسىن قازاقستان رەسپۋبليكاسى پارلامەنتى سەناتى جانىنداعى سەناتورلار كەڭەسى ءتوراعاسىنىڭ ورىنباسارى ءبىرعانىم ءايتىموۆا، جوعارى وقۋ ورىندارى قاۋىمداستىعىنىڭ پرەزيدەنتى، اكادەميك الشانوۆ راحمان الشان ۇلى، فيلولوگيا عىلىمدارىنىڭ دوكتورى، پروفەسسور، قازاقستان جازۋشىلار وداعىنىڭ مۇشەسى ءۋاليحان قاليجانوۆ، قازاقستان رەسپۋبليكاسى پارلامەنتى سەناتى جانىنداعى سەناتورلار كەڭەسىنىڭ مۇشەسى دينار نوكەتايەۆا قيدى.
قازاقستاننىڭ ەڭبەك سىڭىرگەن قايراتكەرى، بەلگىلى عالىم-لينگۆيست، فيلولوگيا عىلىمدارىنىڭ دوكتورى، پروفەسسور ۆالەنتينا يۆانوۆنا جيىن سوڭىندا ۇستازدىق ماماندىقتىڭ ماڭىزدىلىعى تۋرالى ايتىپ، كەلگەن قوناقتارعا ءوزىنىڭ شەكسىز العىسىن ايتتى.
«ۇستاز بولۋ – ەڭ جاۋاپكەرشىلىگى مول ماماندىق. شاكىرتتەرىمىزگە دۇرىس تالىم-تاربيە بەرۋ – ءبىزدىڭ باستى مىندەتىمىز. ءبىلىمدى ەلدىڭ بولاشاعى قاشان دا جارقىن. ەلىمىزدىڭ وركەندەۋىنە ءوز ۇلەسىن قوسار ۋنيۆەرسيتەتىمىزدىڭ ءبىلىمدى دە بىلىكتى تۇلەكتەرى بيىكتەردەن كورىنە بەرسىن. بۇگىن جيىنعا كەلگەن بارشا قوناقتارعا ايتار العىسىم شەكسىز»، – دەدى ۆالەنتينا يۆانوۆنا.
ۇستازدىڭ ءبىلىم سالاسىنا قوسقان قىزمەتىن باعالاپ، جاس پەداگوگتارعا ۇلگى رەتىندە كورسەتۋ ءۇشىن وتكەن سالتاناتتى جيىن كونسەرتتىك باعدارلاماعا ۇلاستى.