الماتىدا بەلگىلى قازاق جازۋشىسى، جۋرناليست جانە قوعام قايراتكەرى ەركىنباي اكىمقۇلوۆقا ارنالعان ەسكەرتكىش تاقتانىڭ سالتاناتتى اشىلۋ ءراسىمى ءوتتى. شارانى قازاقستان جازۋشىلار وداعى باسقارماسى ءتوراعاسىنىڭ ورىنباسارى قاسىمحان بەگمانوۆ اشىپ، جۇرگىزدى. ءىس-شاراعا ەلىمىزدىڭ بەلگىلى تۇلعالارى، قوعام قايراتكەرلەرى مەن جازۋشىلار قاتىسىپ، اكىمقۇلوۆتىڭ شىعارماشىلىعى مەن ادەبيەتكە قوسقان زور ۇلەسىن ەسكە الدى.
ەركىنباي اكىمقۇلوۆ – كسرو جانە قازاقستان جازۋشىلار مەن جۋرناليستەر وداعىنىڭ مۇشەسى. ءار ءتۇرلى جانردا قالام تەربەگەن جازۋشىنىڭ 20-دان استام كوركەم شىعارماسى جارىق كورگەن. ونىڭ ىشىندە "ءشامشى قالداياقوۆ – ءان پاتشاسى" رومان-ەسسەسى مەن "وزبەكالى جانىبەكوۆ" ءومىرباياندىق رومانى ەرەكشە ورىن الادى. اكىمقۇلوۆ پەسالارى، اۋدارمالارى مەن راديوحابارلارى ارقىلى ادەبيەت سۇيەر قاۋىمنىڭ جۇرەگىنەن ورىن تاپقان.
جازۋشىنىڭ ەڭبەك جولى "لەنينشىل جاس" (قازىرگى "جاس الاش") گازەتىندە ءتىلشى بولۋدان باستالىپ، كەيىننەن الماتى قالالىق پارتيا كوميتەتى، "جالىن"، "جازۋشى"، "راۋان" باسپالارى مەن "كىتاپ جارشىسى" گازەتىندە جاۋاپتى قىزمەتتەر اتقارۋمەن جالعاستى. ونىڭ ءار ماقالاسى مەن وچەركى حالقىمىزدىڭ ءومىرى مەن مادەنيەتىن تانىتۋعا باعىتتالدى.
قازاقستان جازۋشىلار وداعى باسقارماسىنىڭ ءتوراعاسى مەرەكە قۇلكەنوۆ سالتاناتتى جيىندا بىلاي دەدى:
"ءبىز بۇگىن قازاقتىڭ ۇلى جازۋشىسى ەركىنباي اكىمقۇلوۆ تۇرعان ۇيگە ەسكەرتكىش تاقتا ورناتتىق. بۇل كوشەلەر (تولە بي، اباي، شيەۆچەنكو) – قازاق جازۋشىلارىنىڭ ءومىر ءسۇرىپ، شىعارمالارىن جازعان قاسيەتتى ورىندار. اكىمقۇلوۆتىڭ شىعارماشىلىعى قازاق ادەبيەتىنە ماڭگىلىك مۇرا قالدىردى."
شارا بارىسىندا جازۋشىنىڭ ۇلى قۇرمان اكىمقۇلوۆ اكەسى تۋرالى ەستەلىكتەرىمەن ءبولىسىپ، ونىڭ قاراپايىمدىلىعى مەن قايىرىمدىلىعىن ەسكە الدى. سونىمەن قاتار، بالالارى ەرنار مەن عابيدەن دە اكەلەرىنىڭ جولىن جالعاستىرىپ كەلە جاتقانىن اتاپ ءوتتى.
الماتى قالاسى مادەنيەت باسقارماسىنىڭ باسشىسى عاني مايلىبايەۆ، م.و. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ جانە "ونەر" باسپاسىنىڭ ديرەكتورى اشىربەك كوپىشيەۆ ءوز ەستەلىكتەرىمەن ءبولىسىپ، ەركىنباي اكىمقۇلوۆتىڭ قازاق رۋحانياتىنداعى ءرولىن ەرەكشە اتاپ ءوتتى.
ەسكەرتكىش تاقتا – ەركىنباي اكىمقۇلوۆتىڭ ادەبيەت پەن مادەنيەتكە قوسقان زور ۇلەسىن ماڭگى ەستە ساقتاۋ ماقساتىندا قويىلعان قۇرمەت بەلگىسى. قازاق رۋحانياتىنا وشپەس ءىز قالدىرعان تۇلعانىڭ جارقىن بەينەسى ەل جادىندا ساقتالادى.