قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا قازاقستانداعى انا مەن بالا ءولىمى تاقىرىبىنا ارنالعان جيىن وتكىزدى.
جيىن اتىراۋ قالاسىندا ۇيىمداستىرىلدى، دەپ حابارلايدى Almaty-akshamy.kz.
«انا مەن بالا ءولىمىنىڭ دەڭگەيى – ەل مەديسيناسىنىڭ دامۋىن سيپاتتايتىن ماڭىزدى كورسەتكىشتەردىڭ ءبىرى. بۇل كورسەتكىشتەر مەملەكەتتەگى ءومىر ءسۇرۋ دەڭگەيى تۋرالى دا ايتادى، سودان كەيىن ول حالىقارالىق رەيتينگتەردە دە كورسەتىلەدى. قازاقستاندا بۇل كورسەتكىشتەر بۇرىننان ءوسىپ كەلە جاتقانىمەن، سوڭعى ۋاقىتتا اسقان جىلدامدىقپەن وسە باستادى. ءبىز ءاربىر ايەل مەن ءسابي ءۇشىن كۇرەسۋىمىز كەرەك»، - دەدى تۇرسىنبەكوۆا.
كانديدات ranking.kz دەرەكتەرىنە سىلتەمە جاساي وتىرىپ، بىرنەشە سيفرلاردى العا تارتتى.
ۇلتتىق جوسپارعا سايكەس، انا ءولىمى 2021 جىلى 100 مىڭ ءتىرى تۋعانعا شاققاندا 35-تەن تومەن بولىپ، 2025 جىلعا قاراي 10-عا دەيىن تومەندەۋى كەرەك. ال، ءىس جۇزىندە 2021 جىلى بۇل كورسەتكىش 44،7 بولدى. اتىراۋ وبلىسىندا انا ءولىمىنىڭ ناقتى كورسەتكىشى كۇتىلگەننەن ءۇش ەسەگە جوعارى بولدى.
«سوڭعى ۋاقىتتا بالالار ءولىمى بويىنشا ناتيجەلەر دە كوڭىل كونشىتپەيدى. جىل سوڭىنا دەيىن قازاقستاندا نارەستە ءولىمى 1000 ءتىرى تۋعانعا شاققاندا 7،6-عا دەيىن تومەندەۋى كەرەك ەدى. الايدا، كورسەتكىش كەرىسىنشە رەسپۋبليكا بويىنشا ورتا ەسەپپەن 8،44-كە دەيىن ءوستى»، - دەدى سپيكەر.
نارەستە ءولىمىنىڭ ءجيى كەزدەسەتىن سەبەپتەرى پەريناتالدىق كەزەڭدە تۋىندايتىن جاعدايلار (932 نارەستە)، تۋا بىتكەن اۋىتقۋلار ءجيى كەزدەسەدى (335 نارەستە)، سونداي-اق ينفەكسيالىق جانە پارازيتتىك اۋرۋلاردىڭ دا اسەرى بولادى (72 نارەستە).
«انا مەن بالا ءولىمىنىڭ الدىن الۋعا باسا نازار اۋدارىلۋدا. ول ءۇشىن قوعامدىق ۇيىمدارمەن، عالىمدارمەن، ساراپشىلارمەن جاڭا شەشىمدەردى تالقىلاۋ ماڭىزدى. شالعاي ەلدى مەكەندەردە ەڭبەك ەتەتىن ايەلدەر ءۇشىن قولايلى جاعداي جاسايتىن ءتيىمدى ينفراقۇرىلىمدى قۇرۋ قاجەت. فەلدشەرلىك-اكۋشەرلىك پۋنكتەر مەن دارىگەرلىك امبۋلاتوريالارداعى مەديسينالىق كادرلاردىڭ تاپشىلىعى ماسەلەسىن شەشۋ، وسى سالالارداعى مەديسينالىق جوعارى وقۋ ورىندارىنان مامانداردى كوپتەپ شىعارۋ – بۇگىنگى كۇننىڭ تالابى. مۇنداي پروفيلدەگى دارىگەرلەردى جاقسى ىنتالاندىرىپ وتىرۋ كەرەك»، - دەپ اتاپ ءوتتى قۇقىق قورعاۋشى.