الماتىداعى العاشقى قار جاۋعان كەزدە دوڭگەلەكتەرىن «قىسقىعا اۋىستىرماعان» كولىك يەلەرى اپاتقا ءجيى ۇشىرادى
وڭىرلىك كوممۋنيكاسيالار قىزمەتىنىڭ بريفينگىندە الماتى قالاسىنىڭ پد اكىمشىلىك پوليسيا باسقارماسى باسشىسىنىڭ ورىنباسارى بولاتبەك باياتانوۆ اۆتوكولىك يەلەرىن اۋا رايىنىڭ قۇبىلۋىنا قاراي، جولدا بارىنشا اباي بولۋعا شاقىرادى. مۇنداي ەسكەرتۋلەر جاياۋ جۇرگىنشىلەرگە قاتىستى، دەپ حابارلايدى Almaty-akshamy.kz.
پوليسيا قىزمەتكەرى الماتىنىڭ كۇرت كليماتتىق ايماقتا ەكەنىن ەسكە سالدى. ءبىزدىڭ قالا اۋا تەمپەراتۋراسىنىڭ كۇرت وزگەرۋىمەن ەرەكشەلەنەدى.
«بىزدە كۇندىز اۋا تەمپەراتۋراسى 10 گرادۋس سەلسييدى كورسەتسە، تۇندە 0 گرادۋستان تومەن تۇسەدى. وسىعان بايلانىستى تاڭعى جانە كەشكى ۋاقىتتا جول ءۇستى قاتقاق بولىپ جاتادى. اۆتومەكتەپتەردە، ادەتتە، وسىنداي كەزدە كولىك جۇرگىزۋدى ۇيرەتەدى. مۇنداي جاعدايدا جىلدامدىقتىڭ كەنەتتەن وزگەرۋىن بولدىرماۋ، كولىك قۇرالىن ءبىرقالىپتى باسقارۋ كەرەك. وعان قوسا، ءجۇرىپ بارا جاتقان كولىكتەر اراسىنداعى قاشىقتىقتى ۇلعايتۋ كەرەك»، – دەدى بولاتبەك باياتانوۆ.
قىس ماۋىسىمىندا جۇرگىزۋشىلەر كولىگىنىڭ تەحنيكالىق كۇيىنە ەرتەرەك نازار اۋدارىپ، دوڭگلەكتەرىن قىسقى رەزيناعا اۋىستىرۋ، جارىق، اينەكتى تازارتۋ، ەلەكتر سىمدار جۇيەسى، اككۋمۋلياتور قۋاتىننىڭ جۇمىسىن تەكسەرىپ العاندارى ءجون.
«اۋا تەمپەراتۋراسى تومەندەگەندە، جازعى دوڭگەلەكتەرمەن ءجۇرۋ وتە ءقاۋىپتى بولادى، تايعاناۋ اسەرى پايدا بولادى، كولىك سىرعاناپ، توقتاي الماي قالادى. قوزعالتقىشتان شىعارىپ قويۋ دا ءقاۋىپتى، ويتكەنى مۇنداي كەزدە جول-كولىك وقيعاسى ءقاۋپى ارتا تۇسەدى. قاراشا ايىندا قار تۇرىندەگى العاشقى جاۋىن-شاشىن ءتۇسىپ، ودان كەيىن جول-كولىك وقيعالارىنىڭ سانى ارتتى. نەگىزىنەن مۇنداي جاعدايعا كولىكتەرىن قىسقى دوڭگەلەككە اۋىستىرماعان جۇرگىزۋشىلەر تاپ بولادى»، - دەدى پوليسيا پولكوۆنيگى.
ءتارتىپ ساقشىسى كۇنتىزبەلىك قىستى كۇتۋدىڭ قاجەتى جوق ەكەنىن جانە كولىك رەزەڭكەسىن قازىردەن باستاپ اۋىستىرۋ كەرەكتىگىن اتاپ ءوتتى. ويتكەنى، جول ءجۇرۋ ەرەجەسىنىڭ «جول قوزعالىسى قاۋىپسىزدىگىنە جانە قورشاعان ورتاعا ءقاۋىپ توندىرەتىن كولىك قۇرالدارىن پايدالانۋعا تىيىم سالىنعان اقاۋلار مەن جاعدايلاردىڭ تىزبەسى» 5-بولىگىنىڭ 590-بابىنا سايكەس 5 اەك مولشەرىندە ايىپپۇل سالۋ قاراستىرىلعان. بۇل ەرەجەنى ەلەمەگەن جۇرگىزۋشىلەر ايىپپۇل تولەيدى.
وكق بريفينگىندە بولاتبەك باياتانوۆ 2022 جىلدىڭ باسىنان بەرى الماتى قالاسىندا 3073 جكو تىركەلگەنىن، ونىڭ سالدارىنان 81 ادام قازا تاۋىپ، تاعى 3496 ادام ءتۇرلى دەنە جاراقاتتارىن العانىن ايتتى. وتكەن جىلدىڭ سايكەس كەزەڭىمەن سالىستىرعاندا جول-كولىك وقيعالارى 21،5%-عا، قازا تاپقاندار 20%-عا، جاراقات العاندار 18%-عا وسكەن.
«جول-كولىك وقيعالارىنىڭ الدىن الۋ ماقساتىندا پوليسيا دەپارتامەندى كەشەندى تۇردە «ابايلاڭىز، بالالار»، «ءقاۋىپسىز جول»، «اۆتوبۋس»، «قۇقىقتىق ءتارتىپ» پروفيلاكتيكالىق شارالارى وتەدى»، - دەپ ءتىزىپ شىقتى پوليسيا قىزمەتكەرى.