دجەنني كارينيان G20 ەلدەرىنىڭ ءبىرىنىڭ اسكەرىن باسقارعان العاشقى ايەل گەنەرال اتاندى.
كانادا قارۋلى كۇشتەرىنىڭ باس قولباسشىسى قىزمەتىنە ەل تاريحىندا تۇڭعىش رەت ايەل ادام تاعايىندالدى، دەپ حابارلايدى Almaty-akshamy.kz
دجەنني كارينياننىڭ اسكەر سالاسىندا جيناعان ايتارلىقتاي تاجىريبەسى بار. ول كانادا قارۋلى كۇشتەرىندەگى ۇرىس بولىمشەسىن باسقارعان العاشقى ايەل بولدى. قىزمەت بارىسىندا يراك، اۋعانستان، سيريا جانە بوسنيا سياقتى ەلدەردە تاپسىرمالار ورىنداعان. سوڭعى ءۇش جىل بويى ول 2021 جىلى اسكەردەگى جىنىستىق قۋدالاۋ جانجالىنان كەيىن قۇرىلعان ارميانىڭ كاسىبي مىنەز-قۇلىق جانە مادەنيەت باسقارماسىنىڭ باستىعى قىزمەتىن اتقاردى.
كانادانىڭ پرەمەر-مينيسترى دجاستين تريۋدو بۇل كۇندى تاريحي دەپ سيپاتتاپ، دجەنني كارينياندى تەك كانادالىقتارعا عانا ەمەس، بۇكىل الەمگە ۇلگى بولىپ وتىر دەپ اتاپ ءوتتى. كارينياننىڭ تاعايىندالۋى كانادانىڭ اسكەردەگى گەندەرلىك تەڭدىكتى ىلگەرىلەتۋ جونىندەگى مىندەتتەمەسىن جانە جوعارى اسكەري لاۋازىمداعى ايەلدەر ءرولىنىڭ ماڭىزدىلىعىن كورسەتەدى.