كامەلەتكە تولماعاندارعا «كالمار ويىنىن» كورسەتپەۋ كەرەك

وڭتۇستىككورەيالىق «كالمار ويىنى» سەريالىندا قاتىگەزدىك پەن جاۋىزدىق كورىنىسى كوپ.

سوڭعى كەزدە الەۋمەتتىك جەلىنى شۋلاتقان اتىشۋلى سەريال تۋرالى ق ر ءبىلىم جانە عىلىم ءبىرىنشى ۆيسە-مينيسترى شولپان كارينوۆا پىكىر ءبىلدىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.

«فيلم قازاقستاندا تۇسىرىلمەگەن. فيلمدە بەلگىلى ءبىر شەكتەۋلەر بار، ول 18 جاستان اسقان ەرەسەكتەرگە ارنالعان. سوندىقتان، ەڭ الدىمەن اتا-انالار وسى فاكتىگە نازار اۋدارۋى قاجەت. ەكىنشىدەن، اتا-انالار دا، مەكتەپ تە تاربيەلىك شارالار اياسىندا بالالارعا پايدالى اقپاراتتى تەرىس اقپاراتتان اجىراتۋ داعدىلارىن ۇيرەتۋى كەرەك. مەكتەپتەردە دە وسى ماسەلەگە نازار اۋدارعان ءجون. ارينە، بالالار پسيحيكاسى ەندى-ەندى قالىپتاسۋ كەزەڭىندە. سوندىقتان كەز كەلگەن اقپاراتتى ۇيدە اتا-انالار، مەكتەپتە پەداگوگتار باقىلاۋى كەرەك»، - دەپ جاۋاپ بەردى ۆيسە-مينيستر.

ونىڭ ايتۋىنشا، بيىلدان باستاپ بارلىق ءبىلىم بەرۋ ۇيىمدارىندا جاھاندىق قۇزىرەتتىلىك كۋرسى ەنگىزىلىپ جاتىر. بۇل كۋرس بالالاردىڭ سىني ويلاۋىن، ەموسيونالدى ينتەللەكتىسىن دامىتادى، اقپاراتتى اجىراتا بىلۋگە ۇيرەتەدى، ونى دۇرىس تاڭدايدى. شولپان قارينوۆا مەكتەپتەر وزدەرىنىڭ تاربيەلىك فۋنكسيالارى اياسىندا سەريالعا قاتىستى شەكتەۋلەرگە نازار اۋدارۋى كەرەكتىگىن ايتتى.