بۇگىن - حالىقارالىق اسپازدار كۇنى

20 قاراشا كۇنى جىل سايىن اسپازدار كۇنى اتاپ وتىلەدى

حالىقارالىق داتا 2004 جىلى كۋلينارلىق قوعامداستىقتاردىڭ دۇنيەجۇزىلىك قاۋىمداستىعىنىڭ باستاماسىمەن بەكتىلگەن. بۇل ۇيىمعا الەمنىڭ ءتۇرلى ەلدەرىنەن 8 ملن وكىل مۇشە. سول سەبەپتى الەمدىك اسحانا شەبەرلەرى ءوز مەرەكەلەرىن اتاپ وتەتىنىنە تاڭ قالۋدىڭ قاجەتى جوق. 

حالىقارالىق اسپاز كۇنى بۇگىنگى تاڭدا الەمنىڭ 70-تەن استام ەلىندە تويلانادى. كۋلينارلاردان بولەك مەرەكەلىك شارالاردى ۇيىمداستىرۋعا بيلىك ورگاندارىنىڭ وكىلدەرى، تۋريستىك كومپانيا قىزمەتكەرلەرى، سونىمەن بىرگە، قوعامدىق تاماقتانۋ ورىندارىنىڭ - شاعىن ءدامحانالار مەن تانىمال مەيرامحانالاردىڭ يەلەرى تىكەلەي اتسالىسادى. ولار اسپازدار اراسىندا شەبەرلىك ساعاتتارىن ۇيىمداستىرىپ، بىرەگەي اس ءمازىرىن ازىرلەپ، وعان دەگۋستاسيا جاساپ، تاجىريبە الماسادى. 

اسپاز كاسىبى - الەمدەگى جوعارى سۇرانىستاعى ءارى ەجەلگى ماماندىقتاردىڭ ءبىرى. اڭشىلىقتان كەيىن ەتتىڭ العاش رەت قالاي دايىندالعانى جونىندە تاريحي دەرەكتەر جوق. دەگەنمەن، كۋليناريا سالاسىنا ەسىمى بەرىلگەن ايەل جايلى اڭىز بار. 

ەجەلگى گرەكتەر ەمشىلىك قۇدايى اسكلەپييگە (ريمدىك ەسكۋلاپ) تابىنعان. ونىڭ قىزى گيگەيا دەنساۋلىقتىڭ قورعاۋشىسى دەپ سانالدى (ايتقانداي، ونىڭ ەسىمىنەن "گيگيەنا" ءسوزى قالىپتاسقان). ال ولاردىڭ بارلىق ىستەگى كومەكشىسى كۋلينا ەسىمدى تاماق ءپىسىرۋشى بولعان. ول اسپازدىق ونەرگە قامقورلىق جاساعان. "كۋليناريا" دەگەن ءسوز وسى كىسىنىڭ اتىنان شىققان. 

تاماق ازىرلەۋ تۋرالى العاشقى رەسەپتتەر قاعاز بەتىنە ۆاۆيلون، ەجەلگى مىسىپ جانە ەجەلگى قىتايدا، سونداي-اق، شىعىستاعى اراب ەلدەرىندە  تۇسىرىلگەن.