راديوەلەكترونيكا جانە بايلانىس اسكەري-ينجەنەرلىك ينستيتۋتى كۇزەت روتاسىنىڭ التى ساربازى ەلىمىزدىڭ جوعارى وقۋ ورىندارىندا تەگىن ءبىلىم الۋ قۇقىنا يە بولدى. ولار جاۋىنگەرلىك جانە مەملەكەتتىك-قۇقىقتىق دايىندىقتا جوعارى ناتيجە كورسەتىپ، گرانتتا وقۋ مۇمكىندىگىنە يە بولدى، دەپ حابارلايدى aqshamnews.kz.
ولاردىڭ تورتەۋى وسى اتالعان اسكەري ينستيتۋتقا، تاعى بىرەۋى ت.يا.بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىنا تۇسسە، تاعى بىرەۋى ازاماتتىق جوعارى وقۋ ورنىنا قابىلداناتىن بولادى. گرانتتاردى ءبولۋ ءراسىمى قورعانىس مينيسترلىگىنىڭ سايتىنداعى «سروچنيكي 2.0» ەلەكتروندى پلاتفورماسى ارقىلى ونلاين رەجيمدە ءوتتى.
– اسكەري بورىشىمدى اتقارۋ ومىرىمدەگى ماڭىزدى كەزەڭدەردىڭ ءبىرى بولدى، مىنەزىم شىڭدالدى، توزىمدىلىككە ۇيرەتتى. گرانت يەگەرى اتانۋ – ءبىلىم الۋعا مۇمكىندىك قانا ەمەس، اسكەري مىندەتىمدى اتقارۋ بارىسىندا جۇمساعان كۇش-جىگەرىمنىڭ مويىندالۋى دەپ بىلەمىن، – دەپ ءوز قۋانىشىمەن ءبولىستى حالىقارالىق اقپاراتتىق تەحنولوگيالار ۋنيۆەرسيتەتىنە تۇسكەن قاتارداعى جاۋىنگەر نۇربولات اشۋوۆ.
سونداي اق، راديوەلەكترونيكا جانە بايلانىس اسكەري ينجەنەرلىك ينستيتۋتى سەرجانتتار مەن زاپاستاعى وفيسەرلەردى دايارلاۋ باعدارلامالارى بويىنشا اقىلى وقىتۋ ءۇشىن ازاماتتىق جوعارى وقۋ ورىندارىنىڭ ستۋدەنتتەرىن قابىلداۋدا. باعدارلاما بويىنشا اسكەري كافەدراسى جوق جوعارى وقۋ ورىندارىنىڭ ستۋدەنتتەرى وقي الادى. زاپاستاعى سەرجانت اتاعىن العىسى كەلەتىن ستۋدەنتتەر ءۇشىن وقۋ مەرزىمى ءبىر جىل، ال ونىڭ قۇنى – 250 000 تەڭگە. زاپاستاعى وفيسەر بولۋدى جوسپارلاعاندار 500 000 تەڭگە تولەپ ەكى جىل وقۋى كەرەك.