قازاقتىڭ كيىز ءۇيىن ۇناتقان ەۋروپالىقتار ەندى ۇلتتىق ءدام قازىعا ەرەكشە قۇمار. ءتىپتى، جىلقىنىڭ ەتىن ءومىرى جەپ كورمەگەن قارت قۇرلىق تۇرعىندارى ءقازىر قازى دەسە ەلەڭ ەتەتىن بولعان.
شەتەلدىكتەردىڭ جانە ەۋروپاداعى قانداستارىمىزدىڭ سۇرانىسىن وتەپ جۇرگەن جەرلەسىمىز بەلگيادا قازى جاساپ، ساۋداعا شىعارادى، دەپ حابارلايدى Almaty-akshamy.kz qazaqstan.tv-گە سىلتەمە جاساپ.
الماتىلىق ءساعىنعاليدىڭ بەلگيادا تۇرىپ جاتقانىنا بيىل بەس جىل. بريۋسسەلدەگى جوعارعى تەحنولوگيا مەكتەبىندە ءبىلىم العان جەرلەسىمىز، وقۋدان سوڭ، وسىندا جۇمىسقا قابىلدانىپتى. توقىما ونەركاسىبى سالاسىندا بىلىكتى مامان. ەكى جىلدان بەرى قازى جاساۋدىڭ حاس شەبەرى اتانعان. جالعىز ءوزى قارت قۇرلىقتاعى اعايىندى قازاقتىڭ ۇلتتىق تاعامىمەن قامتاماسىز ەتىپ وتىر.
شەتەلگە كەلگەندە ۇلتتىق تاعامداردى اڭساپ، ەتتى، قازىنى ساعىنا باستايسىڭ. سوسىن، ەلدەن الىپ كەلەتىن ادام ىزدەپ، ونى زارىعا كۇتەسىڭ. وسىلاي، بىرنەشە جىل قينالىپ ءجۇرىپ، ءبىر كۇنى قازىنى ءوزىم جاساپ كورۋگە بەل بۋدىم. بۇل جەردە جىلقىنىڭ ەتى تاپشى. سول ەتتى، ىشەكتەردى، بارلىق ينگرەديەنتتەرىن تابۋ ءۇشىن جارتى جىل ۋاقىت كەتتى. وزىمە ىستەپ كورىپ ەدىم، ونان سوڭ، دوستارىم، دوستارىمنىڭ دوستارى، ءارى قاراي، ادامدار بىر-بىرىنەن ەستىپ، قازىعا تاپسىرىس كوبەيدى.ساعىنعالي ماماي، كاسىپكەر
قالانىڭ بالاسى قازى اينالدىرۋدى عالامتوردان ۇيرەنىپتى. جىڭىشكە ىشەككە ەتتى تەز تىعۋ ءۇشىن پلاستيكتەن مىنا قۇرالدى جاساپ العان. تۇتىنۋشىنىڭ تالعامىنا ساي، وزبەكتەرگە ءانىس وسىمدىگىن قوسىپ، ەۋروپالىقتارعا قازىنىڭ مايىن ازداۋ قىلىپ اينالدىرادى. بارىنەن دە ساعىنعاليعا جات جەردەگى ءوز قانداستارىمىز ريزا.
قوناق شاقىراتىن بولساق، ەت اساتىن بولساق، ەڭ ءبىرىنشى حابارلاساتىن كىسىمىز وسى ساعىنعالي. بىردەن اكەلىپ بەرەدى. وتە ءدامدى قازىسى، شىنى كەرەك. اندا-ساندا ساعىنىشتى باسامىز دەپ الىپ تۇرامىز. بارلىق قۇرامى، ءدامى قازاقستاندا جاسالىناتىن قازى سياقتى.اينۇر وڭتالاپ قىزى، بەلگياداعى قازاق دياسپوراسىنىڭ وكىلى
جەكەلەگەن ادامداردان بولەك ساعىنعالي ءقازىر ەۋروپا قازاقتارىنىڭ توي-دۋماندارىنا ءىرى كولەمدە تاپسىرىس الىپ ءجۇر. قازىنىڭ باعاسى سالماعىنا بايلانىستى، 15 ەۋرومەن 25 ەۋرو ارالىعىندا. قازاقتاردى قۋانتىپ، شەتەلدىكتەرگە ۇلتتىق تاعامدى دارىپتەپ جۇرگەن ءساعىنعاليدىڭ ەندىگى كوزدەگەنى-بەلگيادا قازى جاسايتىن سەح اشىپ، دايىن ءونىمدى جەرگىلىكتى دۇكەندەرگە ساتىلىمعا شىعارۋ.